潘啟情去年母親節爭世青冠軍不果後，離開成名拳館，輾轉落戶新拳館任教練，雖然告別舊團隊後他未有再登擂台，但他透露現時獨力處理訓練和比賽事宜，預告夏天將到東南亞比賽，繼續職業拳手路。
24歲的潘啟情早年於曹星如過去所屬的拳館出道，他曾奪WBC輕蠅量級世青洲際金腰帶，可惜他去年失落世青冠軍後再無比賽消息。他透露過去一年經歷大轉變，去年敗北後休息一輪便離開舊拳館，轉到另一地方任教，雖然一切從零開始，並要「一腳踢」主理訓練和比賽，心中依然抱負職業拳手夢，「難度都大，訓練冇以往咁密，以前有好明確目標幾時會有比賽去練習，但𠵱家要靠自己一腳踢做，但都係一個好嘅嘗試，呢一年都係個空白期，我唔想浪費自己由20歲起一路累積嘅嘢。」他表示短期內會到泰國出賽熱身，夏天或到菲律賓再戰正式賽事，劍指亞洲金腰帶。
現時潘啟情落戶炮台山一拳館，每周約教授10課，惟疫情影響，市民減少到公眾場所，他指學生最多減少五成，「都有影響，大家都擔心疫情之下會唔會傳染到，又唔敢出門，不過學生上堂人數有時又好飄忽，因為大家停喺屋企太耐，但我諗都少咗一半左右。」
記者：洪量丰