唔少藝人好信風水師，唔好以為淨係新人風水師要爭上位，有啲元老級人馬都好緊張自己事業。好似無人不識嘅風水師「吊鐘」，今年新年佢一如往年活躍公仔箱，有節目搞記者會，佢亦唔介意同班後輩新人一齊出席。可能吊鐘已經上咗位，點都鬆懈咗，當佢去到現場發現，另外兩位新晉風水師竟然為討好記者大派利是，仲要派埋自己嘅著作同埋相關產品，而吊鐘就一啲準備都冇。
吊鐘一向出名為人疏爽吃得開，呢個位點可以輸畀後輩，佢首先捉住現場負責嘅公關，鬧咗一輪點解其他人送嘢，唔事先知會佢，之後吊鐘即叫助手去第二間房封利是，派畀記者。本來利是大封啲，乜都補返數，但吊鐘唔忿氣，仲call有份代言嘅海味店速遞，送堆貨過嚟畀佢派，而呢間公司又真係好嘢，短短20分鐘就趕到，當時班記者仲未走，吊鐘就若無其事咁派禮物，好似一早準備咗，真係唔到你唔服。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。