以為劉俊謙贏在起跑線，拍第一套電影就當上影帝？其實不。拍電影，的確是第一次，但他之前早已長時間在劇場界打滾。他說：「浮浮沉沉！」
以為劉俊謙科班出身，舞台經驗豐富，演戲難不了他？實情是，他由讀演藝到畢業後多年，也常處於自我懷疑狀態。他說：「試過無數次唔想做呢行！」
以為劉俊謙天生偶像小生臉，靚仔多女埋身？現實是，他24歲才初戀，拍《幻愛》與女主角蔡思韵撻着，只是人生第二次談戀愛。他說：「初戀都夾雜住痛苦！」
靚仔煩惱時時有。自覺已不再年輕，所以，由以往抗拒被讚靚仔，到如今無任歡迎，「以前覺得靚仔呢樣嘢，係阻住我做戲；𠵱家大個咗，其實都鍾意人哋讚我靚仔，個人反而膚淺咗呀，唔需要咁有深度，我好welcome人哋讚我靚仔呀！」
撰文：文嘉龍
攝影：沈健程
呢條友連theatre都唔識
憑《幻愛》贏得香港電影評論學會「最佳男演員」，演出處男作已經成為影帝，不過到了金像獎，卻未能入圍影帝，只角逐「最佳新演員」一項。劉俊謙說沒有失望，也沒有壓力，「之前知道攞獎（消息），我係排緊《我們最快樂》（舞台劇），我其實排戲都係繼續出錯，我成日覺得要畀自己錯囉！」
對獎項得失放得開，與年紀有關，「我諗因為我唔後生，呢個獎可能喺十年前攞，對我嚟講可能有好多嘢係放唔低，始終𠵱家都31歲，浮浮沉沉咗一段時間，之前有好大段時間都係做theatre（劇場），我着重作品會唔會有多啲人睇到。」
浮浮沉沉，常常處於自我懷疑狀態，「其實我由讀演藝學院開始，跟住開始做theatre，去到2016年開始拍嘢，基本上所有時間，我都處於一個自我懷疑嘅狀態，我諗我試過無數次唔想做呢行！成日都會覺得自己做得唔好，有時導演或者身邊人會對我有好多comment，自己會質疑自己價值，做演員到底有乜意義呢？」
劉俊謙2008年考入演藝學院表演系，那一屆他是插班入讀，只收四個名額，經過三輪面試直接考入。「我記得有三輪interview，第一輪我記得要自己揀首歌唱，我揀咗《You Raise Me Up》（Josh Groban），但係好搞笑，首歌有一個好堂皇嘅前奏，到我開口唱嘅時候，我唱咗十幾秒就『叮』咗，我心諗點解嘅，後尾諗返原來一分鐘唱歌吖嘛，前面三十秒intro佢哋都計！跟住second round佢哋安排一段獨白畀你，可能係一啲masterpiece（名著）嘅劇本！」
去到最後一關，高潮位出現了，「最尾一round其實唔使做戲，係有老師同你傾偈，我記得當時有一個老師叫鄧樹榮（戲劇導演），佢問咗我一個問題，唔知點解嗰時要用英文作答，佢話what kind of theatre you like？（他現場扮聲演回當年情況）佢係咁嘅，咁我就話，sorry，what is theatre？我都讀到中七，但真係冇接觸到theatre呢個英文字，嗰時答完呢一句就心諗，哎吔，應該入唔到喇！我唔知係咪佢哋覺得，嘩，呢條友真係乜都唔識，佢真係又夠膽嚟考喎！有啲老師可能鍾意一啲學生係一張白紙，因為佢冇乜嘢累積咗，覺得佢容易啲吸收。呢條友連theatre都唔識，好，我就收你，咁就真係好多謝佢哋！」
搵到萬五蚊已算幾好
從此認識了theatre這個字，更注定了他在theatre界生存。只是，劉俊謙在演藝年代依然充滿各種少年維特的煩惱，問題青年臉皮薄自尊心強，試過跑到學校廁所喊。他說，是嚎哭。
「好深刻啱啱入去演藝學院，嗰時老師係陳淑儀老師（表演系主任），我成日都覺得自己好勤力，好多嘢都好努力去試。有一日大家同學仔上堂嘅時候，佢同我講you are lazy！我啱啱present完，佢話我you are lazy，即係點解呢？我唔明喎，我谷住道氣啦，一落堂，我即刻走入去後樓梯個廁所喊，係嚎哭嗰隻！啲同學埋嚟，我話我唔係好明，點解我付出咗好似咁多，而喺老師眼中只係一句you are lazy！」
反省過後，才了解老師所指的lazy是他心態上的懶惰。演藝木人巷出身，劉俊謙畢業後專注劇場演出，到2016年才為ViuTV拍劇集，劇場與電視兩邊走。面對理想與現實，煩惱又來了，「我覺得自己係一個比較理想主義嘅人，以前會諗到做劇場係一樣好偉大嘅嘢，但係入到嚟呢個社會，同過好多唔同嘅劇團同唔同嘅人合作，嗰樣嘢唔係我心目中諗到咁偉大囉，即係都會遇到一啲唔係幾好嘅作品啦，自己又會做得唔好啦，劇場又好少觀眾入嚟睇啦！好多呢啲嘢，都會令到我開始懷疑，點解我要做一個演員？」
劇場世界與娛樂圈，誰比誰黑暗？劉俊謙說：「有人嘅地方就黑暗，但係舞台嘅黑暗，相對上mild啲，我覺得舞台人係單純啲；電影嘅世界，成日聽人講就係複雜啦，so far我又好感恩，我遇到嘅團隊都係比較簡單，大家都係做實事，唔係好多是是非非，但係我唔知將來會唔會遇到（更黑暗）囉！」
比較肯定的是，做舞台做劇場，注定難以搵食。「基本上所有人都唔可以靠表演維生，如果做theatre，佢哋有啲要教班啦，去中小學度教班，又譬如有個topic講禁煙，就要去啲中小學度做呀，或者去黃大仙，無端端有個社區演出，要做好多其他嘢去balance！因為一個演出，排練加演出兩個月，可能只係得萬幾二萬蚊，for舞台演員嚟講，如果你可以搵到萬五蚊以上，你已經算係幾好㗎喇！」
劉俊謙慶幸自己未試過窮途末路，但反反覆覆又自我懷疑起來，「我冇試過戶口話得返十位數、個位數，我可能都仲有幾千蚊（剩）！唔係金錢上嗰種辛苦，係有時你都唔知做嚟為乜，觀眾又唔睇，大家又覺得自己做緊一啲好似好有意義嘅嘢，又share唔到畀人，去到一個位會好多自我懷疑！」
我為某一啲人去發聲
生於小康之家的劉俊謙，自己搵自己使，「屋企係小康之家，金錢上唔使太擔心，照顧到自己就OK！爸爸媽媽𠵱家都退咗休，之前積落都有一筆積蓄。」身為大仔，沒有養家擔子，「暫時未使住！我都希望自己能力再大啲可以照顧返屋企，屋企情況𠵱家都OK，妹妹又獨立，啱啱結咗婚。」
沒有養家煩惱，又有另一種困擾。劉俊謙曾經對演戲失去信心，獨個兒跑到台灣三個月學現代舞，就是為了逃避演戲。「我諗返起有好多唔開心嘅階段，我覺得同性格有關，因為自己性格好picky（挑剔），好多嘢都覺得自己做得唔好。我諗返起有一個階段，我要去外國演出『愛丁堡藝穗節』，我做一個跳舞演出，要去澳門排練，嗰時仲要周身傷，keep住跳就keep住痛；跟住去到愛丁堡，連續做25場，中間得一至兩日day off，日日跳喎，但係其實我唔係dancer，但要做到dancer要做到嘅嘢，係有少少吃不消！我仲記得喺愛丁堡，好靚，每一日演出完，自己就坐咗喺城堡下面，望住個天空，每一日問自己做緊啲乜囉，呢一個情景唔止發生過一次，成日都問自己做緊啲乜嘢！」
不過，現在的劉俊謙，身邊多了一個人為他解答問題了，就是他拍《幻愛》的女主角兼女朋友蔡思韵。他說：「絕對係，因為又係同行，之前我選擇自己一個去面對啦，有好多時就會鑽咗牛角尖，𠵱家有一個人喺身邊，佢就唔會畀你去鑽牛角尖，即係你唔好鑽牛角尖，你鑽我，我聽；佢有嘢，我就會話你唔好鑽牛角尖，你鑽我，我又聽你！咁樣嘅一個關係其實係好好多嘅！」
以往愛鑽牛角尖的他，太多缺陷，「最缺陷係唔識得欣賞自己！譬如每次排練緊或者演出緊，都keep住『劉俊謙同劉俊謙講』，你真係好差呀，你真係垃圾，人哋讚你嗰啲，假㗎！人哋彈你嗰啲說話，就係真㗎！活喺一個咁嘅世界入面，我覺得做創作嘅人都有呢種傾向！」
雖然煩惱有不少，但滿足感依然有。像他演的《教束》，除了令他成為民選視帝，他說最重要可以為社會發聲。「譬如《教束》，當嗰樣嘢係為咗個社會，我為咗某一啲人去發聲，觀眾係好enjoy，同時間又會同我一齊流眼淚，我覺得我嘅工作有意義囉，但係完咗之後呢，依然都會question，咁之後呢？我會唔會再做到啲有意義嘅作品呢？我嘅去向係點呢？其實都有好多未知數。」
疫症當前，更多未知數。劉俊謙說：「太多嘢控制唔到，我反而呢一刻最希望香港可以好起來，香港人可以好起來！」
【後記】變到唔靚仔
以為劉俊謙會像其他演藝師兄弟，如游學修、吳肇軒般簽間大公司好遮蔭？又不是。這天陪住他訪問照顧周到的，是這些年與他齊上齊落的經理人呂甜（Tim Lui），呂甜亦即RubberBand主音6號老婆。
兩人更試過合力摧毀靚仔形象，「之前ViuTV有套劇叫《未來還未來》，係呂甜，即係我經理人寫嘅，我哋諗盡方法去摧毀我嘅形象，整個好𨫠嘅髮型，留核突鬚，化到我滿面都係暗瘡，着啲好核突嘅衫！我會覺得好開心，我覺得會有趣過keep住製造小生囉，我希望我之後個方向都係，我可以變囉！」
化妝：Carmen Chung of carmencmakeup_hair
髮型：Lupus Chui of Orient4.com.hk
服裝提供：Fendi
場地提供：The Stadium Bar & Restaurant