利物浦今季英超保持不敗喺榜首遙遙領先，睇怕首奪英超都冇乜走雞，不過最終結局可能會出乎意料，紅軍贏盡所有英超球隊，但可能就敵唔過肺炎疫情。有指假如今季英超最終因武漢肺炎疫情而腰斬，紅軍未必能贏得英超冠軍。
如腰斬或投票定生死
武漢肺炎目前喺世界各地爆發，歐洲各地足球賽事陸續受到疫情影響。英國《每日電訊報》指出，假如疫情不斷加劇，英國政府可能會暫停所有大型公眾活動，仲話呢個禁制令起碼兩個月，英超當然都受影響，可能最後要提前腰斬。不過最大問題係，英超賽會並冇明文規定，點樣去處理因重大事故而提早結束賽事嘅情況，簡單嚟講即係無例可依。換言之，假如英超賽事決定提前腰斬，利物浦即使喺榜首不敗遙遙領先，亦未必可獲苦等30年嘅首個英超冠軍；而榜尾降班區嘅三支球隊亦未必要降班。
目前英超今季只係剩番11輪賽事，利物浦只需贏多四場（未計上周六戰果），就可篤定封王，若然因疫情而失落錦標，一定會引起極大爭議。報道指出，一旦英國政府宣佈因為疫情取消賽事，英超賽會將會召開危機會議，商量應對方法，因為除咗聯賽冠軍外，歐洲賽資格同降班情況都會引起爭議，各隊最終可能要投票決定今季嘅成績有冇效，紅軍可能因為咁失落冠軍。不過，各位紅軍球迷都唔使杞人憂天住，因為呢個只係最壞打算，上年球壇都試過發生聯賽腰斬，上年11月智利足球聯賽曾因社會運動而提前六輪腰斬，當時佢哋嘅做法係喺各隊協商下，當時榜首嘅天主教大學成為冠軍，當季亦唔會設立升降班措施。
周日五場意甲避炎要改期
歐洲五大聯賽，暫時受肺炎疫情威脅最大嘅國家意大利，喺周日有多場意甲聯賽終於要取消。意甲賽會喺上周六宣佈，原本安排閉門作賽嘅五場聯賽，包括祖雲達斯主場對國際米蘭(左圖)嘅榜首大戰全部要延期至5月13日上演。其餘四場包括烏甸尼斯對費倫天拿、AC米蘭對熱拿亞、帕爾馬對史帕爾同薩斯索羅對布雷西亞，換言之今日只係剩番卡利亞里對羅馬，呢場喺撒丁島進行嘅比賽如期上演。改期原因係球會方面唔想因為疫情要閉門比賽，冇咗門票收入喎。