武漢肺炎逐步擴散全球，國際足協（FIFA）主席恩芬天奴話唔排除今個月多場國際賽，包括有英格蘭對意大利（圖）嘅國際友賽、歐國盃外圍賽附加賽、22年世盃外同埋東京奧運外圍賽需要延期嘅可能性。國際職業足球員協會表示對喺疫症蔓延下作賽感到憂慮，恩芬天奴仲話，暫時希望三月各場國際賽能夠如期上演，但唔排除會喺必要嘅情況下將賽事押後。多場歐國盃外圍賽附加賽會喺3月26同31日進行，除此之外，2022年世盃外亞洲區亦喺三月上演，當中包括香港作客伊朗，而中國對馬爾代夫嘅比賽，已因為內地疫情而要改到泰國閉門進行。工會強調，抗疫比球賽更加重要，希望各個賽事主辦單位能喺非常時期，果斷採取應對措施。
