左丁山對新科技認識甚少，經常後知後覺。近幾個星期，周圍聽到朋友講Zoom，以為係普通智能電話App，要唔要都冇所謂，點知連藝術家七郎都話用Zoom開會，沙田陳太媳婦話要買多部iPad畀讀幼稚園嘅仔女用Zoom，小丫丫在家工作，唔使返公司，又話用Zoom開會，一位朋友個仔在Co-ed讀書，要開始用Zoom上堂（Co-ed要所有學生都要買一部平板電腦）。
到沙田陳太都話要用Zoom同啲老友記傾偈嘞，左丁山先至開始運用Peter Lynch投資智慧，問投資經理B：「呢隻Zoom有冇股票買賣可以入貨？」投資B大笑：「你住得遠咁背，Zoom去年在Nasdaq上市，已升至110美元，2月21日收市報101.76美元，跌3.53元，但2月24日逆市上升3.19%至105.01，兩個月內升約五成，你敢唔敢高追呀？」又走寶咯，問投資B點解呢隻股升得咁快？投資B話：「一字咁淺，武漢肺炎爆發後，人人少出街，少出埠，公司用Zoom開視像會議，依家大學及富有學校用Zoom上堂，連幼稚園都用Zoom嘞，呢間公司業務形勢大好，係當時得令概念股，故此意大利爆發COVID-19之後，股價急升。」
Zoom就似藥物股，大發武漢肺炎財，如疫情愈擴大，對Zoom愈有利，但疫情過後，Zoom嘅視像會議生意是否可以持續呢？投資B話：「好難講！但疫情令Zoom大大有名，全世界都認識，連你左丁山都話要學用咯，將來大可成為世界第一視像會議軟件，令微軟、CISCO、Skype、Google等會議軟件冇碇企。」
如此巴閉，要知道多啲佢嘅背景，上網一查，哎吔，不得了，又係李先知李嘉誠基金會旗下Horizons嘅投資公司之一，Zoom在成立時，Horizons Ventures已經係機構投資者，估計佔3.47%，李超人真係巴閉，投資美國科技公司之醒，全港無出其右。根據CNBC去年4月14日一篇報道，Zoom於2019年4月18日在Nasdaq上市集資3.568億美元，上市價36美元，升26美元至62美元收市，令公司市值159億美元，創辦人袁征（Eric Yuan）擁有20%股權。
36美元上市，截稿前升到113元，即是升咗214%，可謂驚人，Zoom上市後，曾反覆大跌，今年年初重拾上升軌，有早知嘅話，去年12月可以執到平貨，依家或要等一等嘞。