無綫前藝人、現年40歲的李雨陽近年轉營開食肆當老闆，去年11月在深水埗開店，當日太太鄭嘉詠都有到場協助打點。前晚李雨陽在微博宣佈太太再度有喜，已育有兩歲多囝囝李頌天的李雨陽追女成功，他貼出一家「四」口和囡囡超聲波的照片，留言：「從一個人在人生道路上，走到三個，現在面臨第四位加入，妹妹，我們歡迎你大駕光臨，熱烈期待你加入我們充滿愛的家庭。感恩在生命中遇見你們仨。」
預產期9月
李雨陽夫婦於2017年結婚，三年抱兩，記者昨日致電恭賀，問到太太懷孕多少個月？他說：「啱啱三個月，忍唔住宣佈，因為啱啱一仔一女，預產期9月。」他直言也擔心武漢肺炎嚴峻：「盡量留喺屋企，但有時候天氣好，都會落公園行吓，散吓步，因為太長時間屈喺屋企都唔係咁好，盡量車出車入，去人少嘅地方。」
李雨陽本來有兩間食肆，但受疫情影響，他表示觀塘分店已經結業，他說：「得番元州商場，觀塘廣場做唔住，生意慘淡，我自己都少出街食飯，又點期望多客人嚟食嘢。觀塘店今日清場畀人，蝕咗約30幾萬。」
「壓力都大」
疫情影響食肆要結業，家中又將添新成員，李雨陽坦言：「壓力都大㗎！啱啱一年冇內地工作，𠵱家肺炎又停工，就算開返都唔敢咁快上去，感恩有香港開電視節目做，希望《Fit開有條路》長做長有，陪伴我對仔女成長。」
採訪：陳杰
