【爆相爆片】馮盈盈向來敢做敢愛，參選港姐時已承認有個十優醫生男友Martin鍾文浩（寶寶），愛得高調，去年更承認貼埋首期，買樓與男友同居。當大家以為二人感情穩定，怎料去年底，馮盈盈哭着宣佈分手，稱「相處容易同住難」，而分手後馮盈盈已搬離愛巢。
擺老竇上枱穿煲
未幾，有網民爆料稱馮盈盈與Martin一齊去中環嘉年華遊玩，情人節前夕又與Martin食飯，疑似假分手。當時盈盈回覆傳媒時聲稱2月13日晚上是三人行，表示跟爸爸一齊與Martin商議怎樣處理二人共同擁有的物業：「今次係我哋兩個月（分手）嚟第一次見面，絕對唔係發展地下情。」
《蘋果》讀者潘先生日前透過「爆相爆片」，分享2月13日在尖沙嘴一間餐廳見到馮盈盈跟Martin撐枱腳的過程，但並沒有見到馮盈盈口中的「爸爸」做電燈膽，馮盈盈疑講大話護戀情。
手舞足蹈勁興奮
潘先生表示當晚10時許發現馮盈盈和Martin，二人揀選能望向全維港夜景的位置進餐，而餐廳燈光較暗，氣氛超浪漫。潘先生說：「個男仔好似不停𠱁個女仔開心，我見馮盈盈都有小小激動。我喺餐廳食飯，見到佢哋嗰陣，估佢哋差不多尾聲食完，由於現場都好黑，都冇乜人留意佢哋。」
根據潘先生提供的照片，餐桌上只有兩份晚餐，Martin只飲清水，反而馮盈盈就飲白酒。二人雖然沒有親暱動作，但馮盈盈身體不時倚向男方，細心聆聽男方講說話。馮盈盈一時皺起眉頭、一時面帶笑容，Martin則非常落力講到手舞足蹈，十分興奮。
馮盈盈前日回覆傳媒查詢時表示：「已經回應過，謝謝。」
採訪：嵐山、魯吉
