意大利因武漢肺炎疫情越趨嚴重，意大利報章《La Nazione》證實，有一位效力意丙護級球會比安尼斯ASD嘅22歲球員，已獲世界衞生組織（WHO）確診患上武漢肺炎，但未有公開該名球員姓名，成為歐洲首位受感染職業球員，因此意甲賽會周四宣佈，包括祖雲達斯主場大戰國際米蘭在內嘅本周五場聯賽，將會閉門作賽。
意甲上周已有三場比賽喺疫情蔓延下要延期，當中包括國際米蘭主場對森多利亞。今周較早前，已傳出祖雲達斯下周日主場對國際嘅意大利國家打吡要閉門進行，意甲賽會周四終於發出聲明，證實呢場今季爭冠前哨戰要閉門作賽。
除咗呢場意國最矚目嘅大戰，烏甸尼斯主場對費倫天拿嘅周六場，同埋另外三場下周日上演嘅意甲比賽，包括AC米蘭主場鬥熱拿亞、帕爾馬對史帕爾同薩斯索羅對布雷西亞，同樣都要閉門進行。