【爆相爆片】鄭伊健同太太蒙嘉慧（Yoyo）拍拖結婚相處14年，一直恩愛，喺武漢肺炎疫情下，唔少港人盡量留喺屋企避「炎」，不過伊健夫婦生活冇變，繼早前現身跑馬地約朋友食雲吞麵後，相隔冇耐，佢哋就飛咗去日本福岡旅行，仲俾本報讀者黎小姐透過「爆相爆片」，分享佢哋喺街頭踩單車嘅情況。
當日下午大約2點，熱愛運動嘅伊健同Yoyo喺福岡嘅大濠公園附近踩單車，佢哋着住黑色情侶裝，停喺十字路口傾偈唞一唞，明顯好享受呢種無拘無束嘅感覺，比起喺香港放下戒心。
有講有笑
伊健一邊撥弄招牌長髮，一邊同愛妻Yoyo有講有笑，傾咗一陣先再出發，讀者黎小姐話：「佢哋傾得好開心，Yoyo等伊健戴上手套後，先至開車繼續踩，睇得出佢哋好有默契。」伊健同Yoyo對日本一向情有獨鍾，七年前選擇喺東京結婚，之後多次旅行都係去日本。伊健性格好動愛玩，最愛打機、打波、行山、踩單車，同Yoyo好夾。雖然人在日本玩樂倍感輕鬆，但日本現時疫情有蔓延趨勢，而片段中，伊健兩公婆都冇戴口罩， 似乎要加強防疫意識先得。