內地媒體根據政治要求，講中國在新年後推動復工，暢通經濟循環，似乎一切順利，三月可全面投產。
但本港有不少廠家商人在內地設廠，做生意，私底下就冇一個認為復工順利，起碼在消息最靈通之大灣區，並非如此。左丁山認識不少工商界中人，幾乎全部不認同三月完全復工之說，皆曰不可信，呻到樹葉落。
廠商講：「先要當局審批復工，係有工人陸續報到，但從省外回來，一律需首先檢查，無事先准開工，成個二月都停晒工咯，三月份頂多恢復五六成生產力，還要求神拜佛唔好再有疫情突變，如監獄確診大爆發之類，殃及池魚。」
貿易商：「基本上至今未有人開工，我唔敢上去，佢地唔敢落嚟，你估14日隔離好好玩咩，一味話復工，得個講字，交貨無期。」
初創企業創辦人：「本已初步收到外國試貨定單，但產品在珠三角製造，至今未能送來香港，我地又唔敢上去攞貨，於是冇得交貨，外國客戶肯等候，但當然唔付款啦，創投基金呢個時候就彈開，唔再同我地傾注資，話遲幾個月再講。政府抗疫基金好似周圍派錢，但我地冇份，唯有等自己死亡。」
學術交流，大教授話已完全斷絕，內地實驗室已關門，科研進程係咁先。
建築界：「內地預設組件交唔到貨，本地地盤造公屋建築嘅，冇組件，開工做到乜？」
幾乎人人都話唔掂，咁第一季生產出口唔慌有增長啦，必定下跌，經濟分析師如果講今年中國GDP可以保6，一定係政治正確行先，美國投資銀行大摩就睇中國今年第一季增長3.5%，苟如是，中央一定震動。2003年有沙士時中國GDP係1.66兆美元，2019年有14.14兆美元，增加了85倍，係世界第二大經濟體系，一個百分點就係1,400億美元，增長率降低2個百分點，就代表失去GDP 2,800億美元，約一萬九千六百億元人民幣，試問中國企業嘅盈利邊度會有增長，恐怕除咗騰訊、阿里巴巴呢類新經濟公司之外，傳統實體經濟公司都難維持，目前內地股市企穩，只係央行大力放水支撐所致，投資者不宜睇得太好，唔好跟風唯恐不及。外國經濟除美國外，歐日汽車工業已經醞釀大裁員，因內地汽車銷售大跌，零件又供應不穩也。汽車號稱係linkage industry，汽車業不景，會產生一連串不良反應，投資者不可不防！