講到在本港設立口罩工廠，長遠來講，成為「社會慈善企業」多過成為賺錢上市企業，最啱由工聯會呢啲有把炮籌款唔怕蝕本嘅NGO去做，林健鋒王維基等人設廠嘅話，遲早要爭取到政府「答允包銷」，先至可以全身而退，但政府或會為林健鋒「包銷」，王維基嘛，親疏有別，食自己啦，政府邊度會幫佢！
王維基目前就幫到唔少中小微企，例如餐飲M素來供應不少橄欖油、紅白酒及進口食品畀食肆，依家梗係生意清靜過慈山寺。左丁山問佢會唔會執埋檔生意，餐飲M話：「我啲客已經執咗好多，自己已經心淡，點知阿仔打開咗HKTVmall條線，依家做網上零售，救番條命，HKTVmall生意太好，帶挈埋我地供應商。」有此條生命線，餐飲M又可以捱落去，大概因為好多市民唔想出街買嘢，避免「緊密接觸」陌生人，時興網購啦，故此益晒王維基。阿Ricky好識睇風頭火勢，觸覺敏銳到極，抵佢發。不過咯喎，佢話要投資生產口罩，又未必係一盤「賺錢」意念。
產品價格常變，經濟學有一個Cobweb Theorem（主要講農產品），指某種產品因突然而來嘅需求，推高價格，於是商人或生產商大力投資擴容，導致供應大增，該產品價格隨即大跌。現在就因為有COVID-19，口罩價才急升，於是不少人說要投資生產口罩，但當肺炎病毒消失，回歸平靜之後，口罩需求一定會急跌，生產口罩到時送都或者冇人要，王維基如果真係要做口罩生意，係賭一鋪而已，可能佢想做善長至係真嘅。最令人不解嘅，就係有人以為可趁此機會在香港搞import substitution industrialization（入口代替工業化）（見經濟日報2月22日A12版），呢個題目左丁山在1976年左右已在「明報」晚報寫過，當然就係批判此概念在發展中國家完全行不通，在印度則拖慢經濟發展，在南美則搞彎晒南美經濟，只有在中國因為人口多，中央集權，可以有機會行得通，但中國首先仍然要靠出口導向工業化（export led industrialization）才得到發展至今天咁發財。香港地方細，人口少，搞甚麼入口代替？真是活見鬼！該作者問：港人口罩需求，究竟幾龐大？以現時市況睇，人人戴口罩，一日用750萬個，一年用2.8億個，係好大呀，但到咗2021年，750萬港人之中，還有幾多人每日戴口罩？2018年，香港有幾多人每日戴口罩？一啲人開口埋口就鬧自由市場經濟無用，要求政府介入，扶助本地工業發展，即係想政府浪費納稅人血汗錢！