財政司司長陳茂波噚日如期去立法會宣讀《預算案》，全程無戴口罩向在席人士大派口水。政務司長張建宗、律政司長鄭若驊同埋13位局長都有列席支持，而佢哋戴口罩嘅比例，都係一半半，以唔戴口罩自豪嘅勞福局長羅致光仍然唔戴罩，同教育局長楊潤雄、運房局長陳帆、環境局長黃錦星、發展局長黃偉綸親身響應特首林鄭月娥嘅「戴咗都要除返」要求。
其實立法會都提升咗防疫措施，除咗之前已經實施嘅到訪者必須量體溫、體溫高於37.5℃嘅人士唔可以入內之外，官員嘅座位亦都有特別安排，二樓嘅官員席上，出席旁聽嘅副局長、行會成員要隔個位坐，全程未見交流。波叔太太許步明一如以往現身支持，全程喺旁聽席點頭如搗蒜，似乎對老公提出嘅措施，非常滿意。佢離開時就冇回應對另一半份預算案有乜睇法。
而在席唔少建制派議員都有戴上口罩，可能怕被波叔口水噴親，但飲食界張宇人一度除罩將隻手伸入個口，唔知係食嘢定撩牙？衞生意識似乎又差啲喎，而立法會主席梁君彥入會議廳時都有戴罩，一坐上主席位就除罩，唔知乜事一度要捽眼？