「早收三日風，爭取扮成功」，係陳茂波宣佈回水一萬蚊後，民建聯就係fb邀功，話自己「得咗喇」成功爭取派錢。一萬蚊未到手，但民建聯就成功吸咗近5萬個嬲嬲。點解市民咁激動？之唔係上星期五立法會討論「防疫抗疫基金」撥款嗰時，民建聯全黨反對民主派提出全民派一萬蚊嘅臨時動議。昨天的我反對，但今日的我又衝出嚟話成功爭取，究竟係咪精神分裂？
網民︰9月錢債票償
有網民屈指一算，如果當日有關抗疫基金嘅派一萬臨時動議獲立法會財委會通過，雖然係無約束力動議，但議會表態對政府都會有壓力，財爺要諗喺唔喺抗疫基金派一萬蚊畀市民。咁樣計法，其實財爺分分鐘夾埋今個預算案，要派兩萬蚊畀香港市民，不過因為「反對派」同市民作對，令大家得返一萬，誓言要喺9月選舉向「最大反對派」民建聯錢債票償咁話。
仲有心水清網民翻民建聯舊賬，其實佢哋之前仲建議幾廿樣預算案措施，𠵱家啲圖仲喺佢哋fb，但絕大部份政府冇採納，只拎住派一萬蚊就聲大大話成功爭取，無法要轉移視線，等自己可以穩住支持者、為選立會加分之餘，又可以大聲講政府接納佢哋意見，預算案表決時可以投支持票，咁就唔會俾選民鬧佢哋盲撐政府！但如果十樣建議九樣唔接納都叫成功爭取，民建聯又真係好易做。
李八方