現年60歲的洪朝豐，結過婚生過仔，也跟香港富婆寶詠琴展開過一段轟天動地的愛情，不過過去二十多年來，他的性向一直備受猜疑。洪朝豐日前主動向記者剖白自己由雙性戀到現在百分百同性戀，向大家宣佈出櫃外，更坦言曾經背住內地男友與寶詠琴交往，但後來獲兩位愛人諒解，更試過「三人行」遊山玩水。
採訪：戴彩煥
攝影：郭賢興
在2月份的某一天，身在清邁第四度短期出家的洪朝豐，主動致電記者，說要公開他60年來的一個秘密——他是一個同性戀者。洪朝豐說︰「我想公開性取向，我由原本嘅雙性戀，慢慢演變成𠵱家嘅同性戀者。點解我會喺呢個時候講呢？因為我覺得人都60歲，根據中國曆法，60歲係一個甲子，一切重新開始，我想講嘅目的有兩個：我想60歲開始，活喺光天化日底下，開始我嘅新生命。」至於另一個原因，洪朝豐表示是因為天生有抑鬱狂躁症，又是一個雙性戀者，又經歷過癌症的煎熬，希望以自身的經歷幫助人︰「我覺得生命除咗喜悅自己外，仲要有益於其他人，因為我有一個確切嘅經驗同體會，知點樣去幫到人。」
要追溯洪朝豐的性取向，從他青葱歲月的愛情故事談起，16歲那年，有女同學向洪朝豐表白，但他仍戇居居不知情為何物，兩年後發現喜歡上那位女同學，但女方已移情別戀︰「細個時好模糊，印象中對男性有好感，但對女性都一樣有好感。喺愛情上，我好遲熟，去到16歲都唔識鍾意人。」直至遇到前妻葉桂好，洪朝豐被對方深深吸引︰「21歲遇到前妻，好被佢吸引，認識冇幾耐我就開始追求佢，我哋好快就一齊住。」同居日子葉桂好意外懷孕，二人決定簽紙結婚，生下獨生子洪葉，但婚姻維持到1988年便結束。
洪朝豐在婚後遇到心儀的男士，正心大心細想向妻子表白性取向時，對方竟快他一步先提出離婚︰「同佢婚姻最後一年，我開始發覺自己鍾意咗個男仔，個男仔喺香港管弦樂團做樂手，係美國人，我同佢當時有啲交往，想同前妻坦白，中止呢段婚姻，但係我未曾開口，前妻先開口話要同我分手，理由係佢喺呢段婚姻唔開心，覺得綁住佢人生發展，同埋我哋咁早有小朋友，佢覺得好困身。」他坦言前妻也是後來才知道他性向轉變︰「好多年後，佢開洪葉書店，我幫佢打工，我先正式同佢講。」但兒子洪葉其實一早知道父親性向，只是沒有跟母親多講半句。
同性性愛感恥辱
作為一個丈夫和父親，喜歡上男人，內心可曾掙扎？洪朝豐想了好一會說：「其實我18歲時發生咗第一次同同性嘅性行為，嗰個係英國人，唔知點解我後生時比較容易吸引外國人……我自己都搞唔清楚。講得清楚少少，嗰次性行為做完後，我覺得自己好污糟、好恥辱、好羞辱，我覺得唔應該做呢樣嘢，跟住就唔記得咗呢樣嘢。」他清楚記得當日他本來在尖沙嘴等人，那個英國中年人就上前搭訕︰「我哋傾傾吓偈，佢邀請我去佢屋企飲杯咖啡，我諗我當時感覺係好奇，去到佢屋企之後，好似好順理成章就發生咗性關係。喺呢個性行為前後，我係鍾意返16歲曾經同我表白嗰個女仔，嗰份係真正嘅感情，去到21歲識我太太時，我都係被佢吸引，我當時係鍾意女仔嘅。」
跟前妻離婚後，洪朝豐先後跟好幾個外籍男士「交往」，但他強調不是拍拖：「正式拍拖係同一個香港人，1991年聖誕，佢喺紐約從事電影工作，佢係我第一個男朋友，同佢拍拖3個月就分手。第二個男朋友係1995年，都係香港人，喺台灣工作，係現代舞蹈團總監，我同佢拍咗拖半年；第三個男朋友係1996年，佢係內地人，我哋拍拖12年。」他繼續細數戀愛史，2009年跟第四個內地男友拍拖10個月，到2012年跟第五個亦是最後一個馬來西亞華僑男友交往，拍拖5個月便分手。
換言之，1998年洪朝豐是背住內地男友，跟寶詠琴拍拖。談到這段錯綜複雜的三角戀，洪朝豐笑說︰「我同寶詠琴1998年11月16號第一次見面，但1996年已經同呢個男仔一齊，寶詠琴係完全知道，佢係個好有閱歷嘅女人，第一次我哋見面嘅時候，因為我要訪問佢講關於安樂死呢個課題，所以事先做research同佢傾偈，喺金鐘香格里拉酒店，啲陽光透過玻璃射落嚟影到佢好靚，我第一眼已經俾佢吸引，我哋係互相吸引。第二日做訪問，過程好投契，我話可唔可以再做多次訪問，佢即場答應，相隔一星期我哋再做訪問，之前我哋又約話再做一次research，呢次佢就約我上佢山頂屋企。嗰晚我好坦白同佢講，我有男朋友，佢話：『我知。』佢嗰時話何鴻燊個女，當佢搵到愛情嘅時候，面上流露嘅笑容同我一樣。」
三人行遊山玩水
洪朝豐應約到寶詠琴山頂寓所傾談，彼此談足7小時：「完咗後，佢車我去灣仔搭過海的士返屋企，臨落車時我好自然錫咗佢一啖，佢冇拒絕我，佢覺得好愉快。事後，佢話第一次同第二次見面之間嗰個星期，香港其實有流星雨，仲話好掛住我，好想同我睇流星雨……嗰時我哋香港京劇研習社有個演出喺西灣河，我邀請佢去睇，喺嗰度我哋第一次拖手，去到12月初，我同另外3個音樂人喺大會堂劇院有個聯合音樂會，作為一個男高音，我請咗佢嚟睇。」當晚表演結束後，洪朝豐致電寶詠琴問可否到她家過夜，寶詠琴答應：「嗰晚係我第一晚喺佢屋企過夜，第一次發生性關係。」
有要好男友仍跟寶詠琴交往，洪朝豐坦承是一種背叛，一腳踏兩船：「係，冇錯，因為開始我同寶詠琴之間關係唔係好明確，我唔敢同我男朋友講，當然喺某一個角度嚟講，我係背叛咗佢，後尾我覺得係時候要同男朋友講，我男朋友都唔開心，但隔咗一日之後佢同返我講，話可以接受我有一個女朋友，因為我唔係鍾意咗另一個男仔，佢可以了解我係一個雙性戀者同對女仔嘅渴求，我內心深處、靈魂深處同肉體上對女仔嘅渴求。」洪朝豐更透露原來寶詠琴與內地男朋友見過面，三人更相處愉快︰「我哋有一齊出去玩，去上海、杭州、蘇州、北京、西安。佢哋兩個都好愛我，都認同我呢個性取向，認同我係雙性戀者，佢哋覺得同我相愛，除咗成全佢哋之外，都成全咗我，因為我係一個雙性戀者。」洪朝豐強調，三個人一起只是遊山玩水吃喝玩樂，就此而已。
洪朝豐與寶詠琴經歷相戀、分手、互罵、復合再分手，他說全因兩人性格差異，造成很多不諒解，他低頭想了一會說：「有一樣嘢我唔怕講，因為呢個係事實，2000年3月，當寶詠琴提出復合，佢話仍然好愛我，好想同我復合，我當下就同佢講：『我哋可以復合，不過我有一個條件，條件就係我唔可以好似以前咁樣同你有正常嘅性關係，佢話：『唔緊要，我哋攬吓錫吓就可以。』同佢發生咗咁多咁戲劇性嘅事情，引起咁多香港人關注，我覺得我哋復合，我唔可以同佢有全然放鬆嘅性關係。」
紐約旅行變分手
兩人每次出門總有拗撬，試過洪朝豐到達巴黎戴高樂機場後找洗手間，因為遲了回去，寶詠琴大發雷霆︰「佢係嗰種樣樣嘢好準時，每樣嘢都喺佢掌握入面，否則就會有脾氣。」至於第二次分手，導火線是寶詠琴不滿他掛住瞓覺︰「2001年8月去紐約旅行，佢秘書幫我哋book咗間食龍蝦好出名嘅西餐廳，因為佢知道我好鍾意食龍蝦，想𠱁我開心。晏晝未夠時間，返酒店後我好攰就瞓覺，佢坐喺我隔籬睇報紙，我瞓醒就行啦，但佢沿路黑晒面。去到餐湯上嚟，佢先講佢嬲，嬲嘅原因係晏晝想同我傾偈，但我走咗去瞓覺，唔理佢，我聽到好失望，個餐湯我一路搞冇飲到，佢開始好驚，我冇出聲，然後返到去佢話我抑鬱狂躁症發作，話要打電話畀我醫生，叫我醫生加藥，跟住第日我就同佢分手。」
一直有人覺得洪朝豐跟寶詠琴一起是為錢，但洪朝豐否認：「我對佢嘅錢冇興趣，一路以嚟我頗為視錢財如糞土，而且1996年我過檔新城，頭一年100萬年薪，第二年係150萬，到我同寶詠琴分手，我賺緊200萬年薪，完全唔需要靠寶詠琴嘅錢都生活到。點解佢哋唔相信世界上有真正愛情？呢班人好可悲，因為證明喺佢哋生命中未出現過真正愛情。」與寶詠琴分手後，也令洪朝豐由雙性戀徹底變成同性戀，皆因男女大不同︰「嗰次喺紐約酒店出嚟，我同自己講，唔會再搵女朋友㗎喇！因為女仔對於我嚟講太複雜，我handle唔到，由嗰時開始，我正式成為一個全然百分之一百嘅同性戀者。」
在洪朝豐抑鬱狂躁症發作期間，內地男友都有來港照顧他，但12年情最終都分手：「原因係覺得我背叛咗佢，佢攞返寶詠琴呢樣嘢，覺得我背叛咗佢。喺我哋12年關係裏面，我有兩次背叛咗佢，所以頭尾有3次背叛咗佢，佢好唔開心，對我完全絕望。」
寂寞愛上新疆男
洪朝豐2009年跟第四個新疆男友拍拖10個月，他坦言是因為寂寞愛上對方，但對方卻因為物質才接近他，他形容這是一段「不堪的愛情」︰「歸根究柢，我因為寂寞先去愛人，所以隻眼睇得唔清楚，吃咗虧。佢喺網上approach我，佢住烏魯木齊，我坐飛機去，睇吓今次能唔能夠搵到真正愛情，然後佢要我幫佢買手機，要蘋果，嗰時要六千幾蚊。」最後洪朝豐買了一部平一半的Ericsson送給對方。但到頭來，他發現︰「原來佢一開始係為咗我嘅錢，而唔係喜歡我個人。」受了教訓，他變了個「新的人」，儘管渴望愛情，但再不會因為寂寞盲目地愛。
2012年，他跟第五個也是最後一個的馬來西亞華僑男友交往，但5個月便分手，至今沒再拍拖。他承認自己渴望愛與被愛，渴望找到真正人生伴侶，跟喜歡的人光明正大拖手行街︰「甚至乎對方想結婚，咪同佢結婚囉！」