全城口罩短缺，作為地區工作者，近期嘅主要「業務」，就係上山下海幫街坊搜羅口罩。身兼立法會議員同葵青區議員嘅民主黨尹兆堅，日前就快閃緬甸24小時，成功撲到5萬個口罩派街坊，阿尹形容今次都算係有驚無險，又話做咗咁耐議員都係第一次化身「送貨仔」。
阿尹喺農曆新年前就搵咗身在緬甸嘅香港人幫手，買入咗一批口罩，不過事隔三星期，供應商都仲未發貨，阿尹於是買機票飛過去親自提貨，順便睇吓發生咩事啦。佢同八方講，去到先發現好多大陸人「攔途截劫」用高價搶口罩，有啲甚至誇張到$100美金一盒。好在，阿尹最終有驚無險咁將1,200盒口罩提走，仲親手帶返香港，以免郵遞出現問題，或者供應商再出蠱惑。
今次班到咁多口罩，佢話部份會分配畀之前預先訂購嘅街坊，亦都會用「快閃」方式派發，務求人人都有份，亦都可以幫到居民應急。