新春期間星洲朋友去印尼偏僻勝地遊玩，我勸危機意識全無的他順便買口罩，他瀟灑揮揮手充耳不聞，回程行李箱填滿永遠不會穿出來見人的少數民族服裝和趣緻擺設，完全當已經殺到牛車水的疫症唔關自己事。新加坡政府免費分派口罩，港胞聽見羨慕到流口水，某春心蕩漾的美女更以為由壯健兵哥人肉送上門，可是身在福中不知福的當地市民嫌每戶五個太少，懶得舟車勞頓，皇帝不急太監急，我又鼓動如簧之舌，「五個雖然不多，但總比一個都沒有多五個」，只恨手上沒有槍，否則一定指住他們的太陽穴逼他們乖乖攜帶身份證排隊領取。隔了一個月，武漢妓女越洋播毒傳聞沸沸揚揚，鑽石公主郵輪確診人數天天增加，東京奧運是否如期舉行打上問號，連遠在天邊的意大利北部也無差別淪陷，終於識得驚了，傳來短訊諮詢中國製造的N95買唔買得過，我嘆了一口氣，幽幽吐出「不聽老人言吃虧在眼前」。無罩十三點大樂，「哈哈哈，唔係我講㗎吓，係你話自己老㗎吓」，即刻忘記水深火熱。
我從來不介意認老，做文青嗰陣為怕大姐姐大哥哥嫌小不點唔夠秤，還鬼鬼祟祟瞞歲，故意報大三年哩。前幾日何姑娘從櫃桶底摷到發黃照片，例牌附送「閣下真係十年如一日」，我老實回答：「張相裏面唯一十年如一日嘅，係副眼鏡。」時光不饒人啊，就算公認保養得宜的麥當娜，巴黎開騷落台和喪婆高第耶交際，側面唔多覺，正面一望鏡頭，哎呀，成個晚年比堤戴維絲咁樣──應屆奧斯卡影后扮茱迪嘉蘭，要專登化個老妝，娜姐根本可以慳番，就咁身便手到擒來。