香港現時缺乏口罩，人所共知，較早前，立法會議員、行政會議成員林健鋒牽頭，一班商界人士集資興建口罩工廠，供本港市場銷售；香港電視王維基又在台灣買生產機械回港製造口罩，林王兩位都係工商界名人，兩位投資設廠，「完工風險」（Completion Risk）應該比較微小，但設廠需時，未知投產之日，香港仲會唔會咁渴求口罩呢。
誰知奇兵突出，第三者工聯會竟然率先跑出話在大埔工業邨設廠生產口罩，日產十萬個，大公報（2月22日）有新聞報道，標題係：「工聯會自產口罩只送不賣」，內又提到工聯會郭偉強澄清，工聯會在政府資助下，為抗疫而生產的口罩只送不賣，務求惠及市民。
生產口罩需要廠房，機械設備、原材料、工人及極嚴格潔淨生產環境，工聯會點解咁把炮，可以首先壓倒林健鋒及王維基，獲得政府從「300億防疫抗疫基金」中撥款資助。據明報社論（2月22日）講及：「針對口罩供不應求，基金除了撥款採購外，亦將資助本地生產，包括資助私人企業建立生產綫，以及資助研發及生產可重用的口罩……第一條可獲三百萬元資助，每多一條額外再獲二百萬元，資助上限為20條生產線，每條生產線每月至少要生產50萬個，政府承諾向每條生產線每月採購最多200萬個口罩，倘若生產線有剩餘口罩，必須在本地出售，整項資助計劃為期一年，涉款15億元。」條件如此慷慨，工聯會先拔頭籌，林健鋒、王維基唔申請資助就笨。
但政府承諾每月購買口罩，何故工聯會宣稱只送不賣？左丁山天生愚笨，諗極唔明。工聯會倘若有心做善事，投產後真係只送不賣，唔駛政府用錢買，梗係至好不過，到咗九月立法會選舉，選民會領情都唔定，但是生產線一開，生產成本行政成本源源而來，而產品只送不賣，工聯會唔蝕到暈？係唔係有大善長在後面撐腰呀？
在香港設廠生產口罩，常年用家只有醫管局、私家醫院及醫務所，返到2018年，大家幾時有戴口罩出街？香港商人如林健鋒、王維基素來精明到極，過去邊會有賺錢生意唔做㗎？現時2020年第一季，因COVID-19肆虐，全亞洲狂搶口罩，先至將口罩價格推高，商場老手湯文亮最瞭解呢個道理，於（2月21日）明報專欄講有市有價，自然有供應，不久之後口罩就會供應過剩，供應太多，市民就可以低價買到口罩。大公報（2月22日）講李克強要求短時間內全國生產過億隻口罩，相信到了今年秋季，今天投資生產口罩之香港商人，怕會成為大善長，市民不妨多謝先。