【本報訊】武漢肺炎疫情持續，法院已停擺近月。政府上周公佈將繼續實施特別上班安排至3月1日，意味聆訊遙遙無期。有正被羈留人士的家屬坦言，羈留所士氣很差，羈留人士開始感到沮喪，「唔知自己等緊乜」。家屬受盡煎熬，指疫情延長還柙時間，對仍是無罪之身的羈留人士不公平，擔心最終羈留時間可能遠比判刑日數長，反問：「啲日子邊個賠返呀？」
記者：袁楚楚
自今年1月29日起，司法機構只提供有限度服務，法院停擺近一個月。Chris（化名）的男友現時還押在壁屋懲教所，案件本來安排在本月再訊，但現已取消亦未定新訊期。她指本來已非常擔心今次再提訊時，控方有新證據或新控罪，但仍希望盡快了結案件，「以為只係煎熬一段時間就完，但法庭𠵱家不斷延長我煎熬嘅時間。」
Chris探望男友時，得知羈留所未如理想，「壁屋唔似市區，嗰邊較凍，衣物係咁多就咁多，都冇得加衫」。她最擔心是男友的心理狀態及情緒，「前面仲有好多單案等緊，佢一直喺入面等，過一段時間，佢會唔會覺得好無助、好迷茫呢？」
子未審先坐感沮喪
陳太（化名）的兒子亦因抗爭案於去年10月被捕，原於本月中再提堂。她指跟上次提堂已相隔聖誕、農曆新年等長假期，豈料審訊因疫情再延期。兩周前她探望兒子，「佢覺得好沮喪，覺得為乜要喺呢度坐？羈留係等審訊，但又唔審、又羈留我喺度，變相未審先坐」。「我只可以安慰吓佢，𠵱家坐多啲，之後坐少啲。」陳太苦笑道。
至於男友在荔枝角收押所羈押的紅豆（化名），上周四探望男友時，男友透露羈留所氣氛很差，不單抗爭案被告，連其他案件的被告亦因疫情無法上庭。「一日本來有好多人出出入入，有啲案情簡單嘅，例如II案（非法入境案）一早就可以判，但係呢啲案都卡咗喺度。」
倡限公眾席如期開庭
紅豆男友自去年11月起還押，但現時案件延期之餘，法庭亦無法交出下次提訊時間，她形容是「無了期的等待」。
紅豆認為只需限制公眾進入法庭人數，及加強法庭衛生就可開庭。Chris則認為，除緊急案件，其他案都應開庭處理，反問：「假如疫情一直持續，係咪3月、4月都一直唔開庭？」陳太指，若法庭未定何時重開，就應讓被告保釋外出；又認為當局應以簡易程序處理現時積累案件，「否則還柙人士無端端坐多咗咁耐，如果羈留時間仲長過判刑，坐多咗嘅時間點算呢？係咪政府賠償？」