張學友前晚接力，喺劉德華將舊歌《愛的橋樑》重新填詞寫成抗疫新歌《我知道》後，推出國語打氣歌《等風雨經過》，呢首歌由周杰倫作曲，方文山填詞，並經由環球音樂fb發佈。
做好個人衞生
《等風雨經過》MV由內地醫護人員片段剪輯而成，學友喺MV尾聲亮相，以普通話為醫護打氣：「人的善與美，在困境與艱難時刻最能體現，謹此向所有勇敢在前線抗疫救人的醫護人員致以最崇高的敬意。我張學友承諾做好個人衞生，懷着不自私、不添亂的態度，防止疫情擴散。保障好每個社區、每個家園，大家一定要平安健康回家。」環球音樂又特別點名多謝曾志偉幫手。
學友特別強調單靠醫護人員努力係唔足夠，呼籲必須每人做好個人衞生，萬眾一心先可以獲得最後勝利。睇嚟學友要提醒吓有份幫手今次抗疫歌嘅曾志偉，皆因曾志偉早前冇戴口罩同大班明星、警察聚會，仲唔用公筷。
至於作曲嘅周杰倫，前日喺社交網上載《等風雨經過》MV，留言︰「感謝所有辛苦的醫護人員，謝謝歌神學友哥的演唱，文山老師的歌詞，雨勳老師的編曲。」仲話曾經將學友寫喺自己《聽媽媽的話》嘅歌詞中，多年後二人合作咗呢首充滿正能量嘅歌。
撰文：馮仁昭