【本報訊】零售蕭條，中小企岌岌可危，大地主相繼減租圖平息民怨，反而小型商場地主企硬。銅鑼灣蘋果商場有租戶訴苦，稱自社會運動發生後，一直要求業主減租，惟業主諸多推搪，最近武漢肺炎襲港，生意額暴瀉九成半，營業額不足5,000元，生意命懸一線，只求業主網開一面稍微減租，讓小舖捱下去。
銅鑼灣蘋果商場由裕景興業持有，同系深水埗西九龍中心，三年前不願為經營雪榚店的租戶續租，有指逼走一對良心「雪榚母子」，被市場冠以「無情業主」稱號。自去年6月社會運動掀起以來，零售市況急轉直下，陳小姐（化名）於銅鑼灣蘋果商場經營十多年的時裝店，生意額已銳減五成，她當時已與租賃部申訴，商場不時封半閘，對生意嚴重造成影響，要求減租紓困，但業主態度照舊，絲毫未動搖。
生意額不足5,000元
陳小姐說：「其實自從去年6月社會運動開始，生意額已經差一半，但嗰陣仲捱得住，交到租之餘，仲有少少錢落袋，我都算數！但再嚟疫情，真係捱唔住，我間舖可以四日冇客嚟，成個場每日得廿個客，農曆年假返嚟之後，生意額連5,000元都冇，唔係話去到咁樣，我哋都唔會咁強烈要求減租！」
生意差之餘，商場亦未有任何推廣，更擅自落閘關門。陳小姐續指，「租賃部承諾過搞多啲活動優惠，但講咗近半年，連一個都冇，好似現在疫情肆虐，喺商場消費滿500元，可以送防疫產品嘅優惠都冇推出！」她還說，商場的保安經常「蛇王」，社會運動期間，商場四時便落閘，這裏的兩個入口，一個落全閘，一個落半閘，「你落得半閘，都係啲客唔行嚟，自己可以早啲走，就係因為咁，冇晒人，我哋被迫提早收工，冇生意做，但租又唔會免返！」
即使有租戶低頭願意縮舖，但業主亦不批准。同場的租戶黃小姐（化名）說，自從農曆年假之後，疫情爆發，商場由「好少人」變到「完全冇人」，自己已經捱不住，交不了租，所以便向租務部申請由大舖搬細舖，但業主一口拒絕，而且更指「你可以搬，但只能細舖搬大舖，租金只有向上調，不能向下調」。
記者上周中午時份曾到蘋果商場，現場只有近廿間舖營業，近乎每間租戶都貼上「租約期滿，全場清貨」的通告，其中有一條通道的店舖更全部關門，未有營業，場面死靜。