原名張嘉年的68歲資深男星太保，憑演出電影《叔．叔》贏得香港電影評論學會最佳男演員獎，臨近70歲再行尾運。在電影圈打滾50年，看過成龍港片的觀眾，都見過他出鏡。太保拍港片出道，卻在台灣獲獎，贏過金馬獎最佳男配角、金鐘獎戲劇節目男配角獎。對於自己於香港發迹，兼於台灣得獎受觀眾肯定，太保直言全因自己樣子夠醜夠怪！
太保自小在尖沙嘴長大，太太是台灣人，太保成為台灣姑爺，一直長居當地。他早前跟太太一起回港為《叔．叔》宣傳，在尖沙嘴九龍公園接受訪問，今年更憑於《叔．叔》的表現，首次叫胡得到第39屆香港電影金像獎的影帝提名。
午馬帶做場務
講到入行，太保18歲出道，師傅是已故資深演員兼導演午馬，他笑說︰「當年師傅見我調皮又成日蒲，佢話『帶你拍戲做明星，你同我一樣生得咁醜樣，跟我學做導演啦。』」第一份工是入邵氏做場記，即是打雜，煩瑣但又最能了解電影流程。先被派到張徹班底，同組位位都是大哥︰狄龍、姜大衛、劉家良，太保說︰「嗰段時期學咗好多嘢，亦鍾意咗電影，一直做到𠵱家。」當年電影業蓬勃，太保跟午馬外闖任副導，沒多久被成龍看中加入嘉禾，他笑說︰「《師弟出馬》、《龍少爺》、《A計劃》都拍成龍，一拍就十幾年。有次問大哥，點解搵我拍戲，佢話因為我個樣夠搞怪喎，啱晒戲入面同佢做師兄弟啲角色，夠盞鬼。」
除了成龍，太保還拍洪金寶的戲，角色都是離不開被打。太保指成龍大哥的戲較正規，忠奸分明，拍洪大哥的戲打得好慘︰「可能我樣衰，次次做衰人俾人打，《龍的心》、《五福星》搵我嚟墊底，演員個個都好勁、好打得，狄威、高飛打得又重手，一腳伸埋嚟都幾辛苦。洪導演唔鍾意周身包到隻糭咁，一塊好薄嘅pad喺重要位、尾龍骨，好多時都係硬食。同元華打又係好慘，佢哋師兄弟好似有虐待狂，落嚟就打鑊甘。我算好彩冇大傷，都係扭親。唔似火星又斷骨，成家班有好多殘廢，意外死都有。」
拍逾300部電影
太保表示被打得最甘，是拍李修賢的電影《公僕》，於戲中扮演道友，最慘是給不懂就力的好兄弟「大儍」成奎安打，他笑說︰「大儍佢又唔識打，惟有硬食。佢嚟真都冇辦法，佢都冇心嘅。」
太保藝名源於年少時在台灣讀完書，同學仔都叫他太保，他說︰「成龍大哥話『就太保啦，容易記』叫到𠵱家。」他說當年在香港拍戲搵錢易，每部戲計幾日已經袋十萬八萬，太保話到今時今日都要多謝成龍大哥︰「嗰時一個月最少3部戲喺手，我拍咗300幾部電影，幾乎你講得出嘅監製都合作過，以前啲戲比較好睇，𠵱家同樣戲飛錢，我梗係睇鬼佬片、幾千萬美金製作，仲睇你中國戲咩？」
撰文︰何永寧
攝影︰林賓尼