武漢肺炎肆虐全港，今時今日出街，戴口罩分分鐘仲緊要過帶手機，唔少市民放假亦唔行商場，改為去郊野公園行吓，起碼空氣清新啲。八方就喺網上見到好多相，周末行山嘅市民多到要排隊落山！行山應該要顧己及人同保護郊野公園，不過好多山友喺fb發文，覺得山野呢排唔單止多咗人，仲好似多咗垃圾同棄置口罩，結果噚日「大嘥鬼」就出片，仲聯同漁護處吉祥物「B仔」一齊，呼籲市民唔好隨地丟口罩。
行山同B仔自拍
作為環境局吉祥物嘅大嘥鬼好耐冇新片，今次聯同B仔拍片 ，無非提大家行山時要愛惜自然環境，唔好胡亂棄置口罩同垃圾，大嘥鬼喺片入面就鬧爆隨地棄置口罩除咗冇公德心，仲同播毒冇乜分別。
身為環保界KOL嘅鬼鬼仲不忘抽「行山銀行」水，話要同B仔上山執口罩，影返張相證明自己有「Work From Hill」喎。而B仔就喺片入面仲不忘教大家點樣衞生安全咁處理用過嘅口罩，叫人將用過口罩小心放入密實袋，之後再用酒精搓手液清潔雙手，包好嘅口罩應該帶返屋企，再棄置喺有蓋嘅垃圾箱，最神奇係大嘥鬼同B仔一除口罩同正確處理後，就立即變高大靚仔！其實都係想鼓勵市民自己口罩自己處理！
八方就覺得，代表消防處嘅「任何仁」都應該拍返條片，提大家行山時唔好亂丟煙頭，生火後都記得要撲滅火種後先好離開，陣間又有山火就唔好啦！
李八方