香港人呢排忙住抗疫自救，抗爭運動好似稍為放慢節奏，但肯定大家冇忘記光復香港呢個終極目標，好似喺美國耶魯留學嘅眾志常委羅冠聰，就繼續幫手推動國際戰線。
話說喺全球好有影響力嘅智庫大西洋理事會，近日成立咗「自由世界委員會」，打正旗號號召全球民主國家一齊對抗極權體制，仲尤其關注中國對世界嘅威脅，日前喺德國嘅聽證會邀請咗聰聰出席發言。據聰聰喺fb講，佢特別提到特區政府呢排應對武漢肺炎疫情，完全係荒腔走板，搞到民間要奮力自救，唔好以為抗疫唔關民主同政治事，實情正正「反映林鄭同北京所代表專制管治以政治凌駕生命，窒礙社會發展，置市民生死於不顧」。
加州港人「連儂布」聲援
其實支持香港嘅仲有一班住喺美國加州嘅港人，早兩日喺屋崙市（Oakland）嘅Lake Merritt搞咗場跑步、野餐同寫心意卡流水式活動，吸引唔少美國人問香港情況，手足乘機解釋，令佢哋關注香港民主發展。呢班手足仲好有心思，將當日用嘅布整成連儂牆，用嚟收集大家嘅心聲同祝福，之後仲會將唔同活動收集到嘅「連儂布」縫合，再運返香港為手足打氣，八方呢度想約定，到時疫情過咗又光復香港，記住一齊除罩相見呀！