【黑鏡線索】
2003年，啱啱畢業出嚟冇耐，做緊第一份工，公司做網購，主要市場係外國，沙士一殺到，本地定單急升，結果做到爆晒數，但網購係特別例外，成個市嘅蕭條氣氛，到而家仲記憶猶新。
大家對沙士嘅記憶，除咗沙士期間嘅慘況，仲有沙士之後個市嘅反彈。基本上，樓市喺沙士之後，就幾乎一直冇停過咁升，升足十幾年，有早知冇乞兒，於是大家嘅集體教訓，係下一次大吉利是，再撞到沙士，記得要入市。
狂印銀紙 累死自己
但香港經濟，好受中国大環境影響。2003沙士，中国經濟仲係當頭起，離見頂仲有成超過十年，香港食住中国嘅升勢，沙士嗰啲偶一為之嘅突發事情，過咗之後，就會上返嚟，甚至因為沙士後中港融合得更犀利，仲逆轉埋沙士前嘅衰退情況。
2020武漢肺炎，首先，中国經濟已經係強弩之末，2008年中国諗住趁美國金融海嘯，乘虛而入，大幅增加槓桿，狂印銀紙，結果幾年下來，倒頭來累死自己，虛到喺中美貿易戰露晒底。
而肺炎比起沙士，中国裏面嘅疫情，嚴重千倍萬倍，賺外滙嘅工廠，本來就利潤微薄，根本冇可能捱得過任何停工。而成個經濟嘅槓桿，已經大到冇任何抗壓空間嘅地步。物流斷裂、供應鏈斷裂、資金鏈斷裂，就算再加快開機印銀紙去救，都只會陷入超級通脹，係糞便味屎同屎味糞便之間嘅選擇。
中国之前廿年嘅經濟起飛，令到中共可以周圍用錢買影響力。喺中国裏面，錢可以用嚟維穩。喺中国以外嘅華人地區，經濟發展可以吸引人心，令人自投一国嘅陷阱，左一句「一家人」，右一句「中国好，香港/台灣好」，民族主義同發大財雙管齊下，將大中華膠情緒推到高潮。
前排有人重post 08奧運時期，高登仔睇完奧運開幕式之後，留言話「好感動」、「正到喊」、「第一次覺得自己係中國人」，情況可見一斑。我自己都曾經為中国足球隊打氣，真心希望中国隊有一日會衝出世界盃分組賽，而家諗返起真係尷尬到不得了。
中国崛起，掛住十四億消費人口市場嘅招牌，攞錢去世界周圍買影響力，包括一帶一路收𡃁，去非洲掃能源同國際票，去澳洲英國西方國家收買政客等等，結果買到WHO嘅主席，喺武漢肺炎期間，變咗中共發言人兼最大啦啦隊，令人慘不忍睹。
倚靠中国 預咗要還
中国崛起係對人類嘅威脅，惟有靠支爆可以解除。當今時今日支爆不是夢，係時候有定心理準備，全地球預咗要還，之前倚賴中国越多，就越要還得多，戒毒雖然痛苦，但利叠利嘅嘢，早還好過遲還。中国崛起之前，地球咪又係冇乜正常運作，香港喺九十年代之前，未有中国條水之前，做個真國際城市咪做到世界級水平。對手新加坡冇咁近水樓台賺中国錢，一樣搵到辦法過得好地地。
切爾諾支爆，係香港撥亂反正、重回正軌嘅時代契機。
撰文：宋漢生
fb : sunghsblog