明日宣讀之2020/21年度財政預算案，出現巨大赤字，已可斷言。經濟學理念上，赤字預算屬財政政策中之刺激經濟增長政策，道理係當經濟下滑，市場蕭條時，私人企業不敢投資，人民不願消費，政府就大力使錢（例如大舉興建公路、高鐵、地下鐵），希望透過乘數效果（multiplier effect），導致市場復甦。赤字預算係凱因斯學派主張嘅，至於政府入不敷支，錢從何來，當然係透過財政部發國債，橫掂銀行在經濟不景時不敢放款，咪就買入國債收息囉。睇睇美國，政府財政赤字巨大無比，2018年有7740億，2019年1萬億，2020年1.1萬億，歷年累積之國債與日俱增，到2020年2月份，有二十三萬二千五百一十五億以上。
美元係世界儲備貨幣，美國印銀紙毫無限制，只要世人一日對美國美元有信心，美國就可以毫無顧忌咁發行國債，支撐財政赤字。中國持有美國國債逾萬億美元，佔美債總數差不多44%，可見中國對美國幾有信心。
香港不同美國，完全唔可以印銀紙及無限量發債，目前有財政儲備逾萬億港元，但若然今年赤字一千億元，已相當於儲備近10%，現時各個政黨一齊要求政府向全民派錢一萬元（即林鄭等高官人人有份），真正「全民」收錢（香港人口750萬）嘅話，要750億元先至夠派，再加埋其他甚麼減免、寬減之類，赤字會好大，特區政府隨時會被國際評級機構降低評級，令阿波哥好頭痕。
赤字預算對香港經濟有無刺激？答案就係：唔係冇，但能量比較小。香港經濟學家老早計算過，香港財政政策之乘數效果低於一，即是政府赤字每一萬元所產生之效果，唔會係二、三萬元，而係少於一萬元，理由很簡單，香港係充份開放型經濟，入口多過出口好多，市民出外旅遊頻頻，收到政府一萬元派錢喎，最大可能就係去咗東京曼谷消費，而唔係到廣東道購物！
歷年來香港倘有赤字預算，都係為咗社會心理因素，派錢等市民埋怨少啲，等政府民望不致大跌，換言之，就是為政治服務，等民建聯可以宣稱「爭取成功」。對比之下，過往夏鼎基係財政司時候，每遇經濟逆境，政府對策便是緊縮開支，力圖減少財政赤字，此乃真正量入為出，現在話事人係林鄭，佢討厭人地講量入為出，陳茂波跟着佢，要多讀幾遍凱因斯理論嚟安慰自己。