不要說「派糖」或者「派錢」，試試講「回水」、「還錢」。今年，全世界都叫苦連天；預算案還錢於民，好清晰係唯一訴求。
供應鏈資金鏈嘅斷裂，可能只係衰退開端。未爆發疫情之前，全球經濟其實都已經極不明朗，甚至呈現敗象，只不過冇人估到觸發點，係一隻病毒。
以某國一直嘅行事作風推測，好大可能會散佈陰謀論，話洋人帝國主義者因妒忌十四億人生活越來越好，搞隻病毒出來。只要永遠有十億八億人，繼續迷信政權無所不能，太陽就如常升起。
不過，現實係政權面對幾個難題，實在唔識處理：一，供應鏈停擺，復工又怕疫症二度爆發。二，資金鏈危危乎，但放水又會引發通脹，亦會令滙率受壓。三，未爆疫症食物價格曾經升唔少，爆埋疫症供應再減，價格應該更難控制。四，用行政措施去壓抑零售價，將破壞增加供應嘅經濟誘因。五，增加進口，對外滙需求增加，人民幣滙率更難唔跌。六，人民幣滙率一跌，賺人民幣收入但欠落美元債嘅企業會更艱難，又出現另一波嘅危機。七，呢啲企業變賣境外資產，香港嘅資產價格好難唔受影響。
簡單講，人民銀行推出量化寬鬆，對香港未必係好事。人民幣多咗，亦唔一定係買港元美元資產。相反，人民幣滙率下跌，之前買落嘅反而變成一個個豬仔錢罌，隨時被扑爆攞錢走。衰退時間越長，以上各種因素引起嘅效應越難預測。所以，從可以想像嘅最壞打算去諗，正路確係要政府還錢於民，但呢個政府往往都會揀一個最激起民憤嘅選項，有理由相信，今次都唔會例外。有江湖傳聞波叔想做下屆特首，我會話，過咗呢關先講啦。
利世民
http://fb.com/leesimon.hk
本欄逢周二、四刊出