森美父母日前從「疫輪」鑽石公主號落船返港後，已入住火炭駿洋邨接受隔離，森美爸爸昨日透過短訊回覆《蘋果》：「好過喺船，開房門都驚！𠵱家嚟到呢度乜都唔驚啦，好舒服，好似嘆世界咁，係食嘢就普通啦，不過都OK啦，又唔係嚟度假！」問他會否感到困在屋內沉悶？森美爸爸笑指：「咁嘅時勢都唔敢行街，喺呢度都有好處，可以慳番好多錢。」
另外，森美昨日於電台節目後受訪，表示和妹妹另有準備食物給父母，他說：「買咗啲乾糧，即食麵同杯麵之類嘅嘢，因為水果、電器、金屬物唔可以帶畀佢哋。」提到有乘客返港後確診，森美表示關心：「𠵱家每日都check住佢哋情況，知道噚日再攞咗血同鼻嘅分泌物樣本。」他坦言因此事多了跟父母溝通：「呢排同佢哋訊息係以往總和，我媽鍾意打機玩耕田，我又試吓玩話join佢，點知佢叫我玩高啲level先再講。」
採訪：王連連、小米