財政司司長在今個星期三發表2020/2021年度財政預算案，會有乜主題曲？睇嚟都係以派糖派錢為主軸，輔以不同行業嘅優惠、稅務津貼。派糖即是搞稅務退減，差餉寬免諸如此類，從過往曾俊華十年財政司長年代照抄過來就得，唔需要甚麼新意；至於派錢，據猜測而言，陳司長一定老大不願，但政黨壓力大，特首相信亦傾向派錢挽救民望，陳司長那有能量抵擋？佢係會計師，稅務專家出身，本性一定唔會鍾意入不敷支（赤字預算），但形勢比人強，下一年度財政預算案一定有大幅赤字，數目有幾多，估中冇獎，一般估計會有六百億元以上，去到一千億都唔奇，好彩本港歷年有盈餘，財政儲備有大把。去年宣讀預算案時，陳司長披露香港財政儲備至2020年3月底預測為11,784億元，相當於本港GDP之39%。去年2月未知道香港會有條例事件引發之社會運動，連累公共收入大減，但即使計埋條輸數，財政儲備仍然在今年3月底超過一萬億，相當於GDP近40%，如此高比例盈餘儲備，世間少有。
正因如此，林鄭特首可以任性使錢，完全唔理會財政預算，今個月推出抗疫基金250億（2月14日），跟住到2月19日即提高至300億，都唔等2月26日財政預算案咯。此舉有兩個理由，第一係政治性，今時今日撥款抗疫，立法會泛民議員那敢反對，可謂快刀斬亂麻，在財委會好快可以通過（按：已於2月22日通過），假若放在預算案內，立法會審議時泛民意見多多，會令特首好唔高興；第二，特首係波士，一聲令下，財政司司長只有聽命，駛乜咁客氣要尊重你？財政司司長似乎有感而發，在2月15日個人網誌講到：「不過為確保公共財政的穩定，在考慮新增的開支時，尤其是經常性開支時，我們必須更注意財政上的可持續性（量入為出）。」好一句量入為出，過往歷任財政司司長都係咁講嘅啦，似乎冇乜新意，但聽在林鄭特首心裏，會老大不高興。2016年林鄭進行競選特首活動時講過：「基本法有160條，沒有理由我要條條都同意你，例如基本法第107條，我就不同意。什麼叫做量入為出？你（政府）有大把錢，有8000億元儲備，你就使啦，為何要『相適應』？」原來林鄭一向唔like基本法第107條講量入為出。陳司長偏要在網誌提呢四個字，可見必各有想法！
後日嘅財政預算案，必定唔係量入為出，赤字巨大，是可斷言。