【娛樂人物】
莊正去年因涉「理大圍城」被控暴動罪；今年2月，他跟唱片公司Sony Music解約，白費5年努力！保釋候審的莊正日前首次現身，在觀塘的studio接受《蘋果》專訪，細說心路歷程：「𠵱家係一個獨立歌手。」
撰文：余燕儀
攝影：陳俊強
莊正被捕那刻，他坦言擔心的不是自己，而是屋企人：「因為環境太危險，有啲緊張，所以顧唔到咁多，最擔心屋企人知唔知我出事，唔知有乜嘢方法聯絡到佢哋，好擔心佢哋。」在逆權運動中，莊正是唯一一個被捕歌手，他卻沒擔憂歌手身份被曝光而影響前途，「就算喺拘留所時都冇諗過呢樣嘢，一片空白，成個人都好緊張，大約拘留咗40個鐘，因為嗰日好多人，大約60、70人，6、7個人喺一個倉，大部份時間都係瞓覺，雖然瞓唔着，但瞓覺時間過得快啲。」
新歌講恐懼
22歲入行的莊正，2014年以組合VnP參加歌曲創作比賽勝出，之後苦等5年沒有歌推出，其間做過兼職、全職，包括sales、網絡marketing、教唱歌，去年單飛推出個人作品《開放世界》。以為踏上青雲路的他，卻因涉「理大圍城」被控暴動罪，早前主動跟唱片公司解約，他說：「公司都好理解我情況，畀我解約，我覺得公司有好多其他人，自己個人問題，唔想影響其他歌手同公司形象，所以我主動提出。」沒了公司可遮蔭，但莊正沒有放棄，最近更寫了首歌，「係被捕之前嘅感受，嗰時好多新聞有人自殺，坊間覺得被自殺，雖然冇證據顯示，但無可避免呢樣嘢係驚，所以呢首歌表達自己或身邊人嘅恐懼。𠵱家焦點去咗創作方面，因為有訊息同經歷想寫低，希望呢年有更加多音樂畀大家聽。我有信心做返歌手，但會獨立做。」
宵禁冇朋友
暴動罪可能被判監十年，案件現暫定排期至下月上庭，擔心坐監是人之常情，莊正說：「其實一定會驚嘅，真係驚嘅，都問過律師意見，佢話𠵱家暫時唔使諗太多，唔使太擔心，亦唔好太定，自己出街小心啲。」保釋候審這段時間，莊正的生活有很大改變，「其實最大影響係宵禁，因為𠵱家我要11點後喺屋企，有時可能同朋友出街，佢哋放工先出嚟，但我9、10點就要返屋企，有啲冇咁開心。」問到現時還有沒有搭港鐵？莊正說：「一時時，因為宵禁要返屋企，趕唔切都冇辦法，但盡量搭小巴同巴士。」見到警察的心情？莊正表示可說是五味雜陳：「我都唔識形容嗰種感覺，會盡量唔想見到囉，除咗呢樣之外，會唔會緊張，我都唔知，可能一啲潛意識反應，大部份人就算冇俾人拉，𠵱家都可能有呢種感覺，我諗唔出奇。」
唔憂會餓死
面對可能前途盡毀，有沒有後悔呢？莊正說：「我覺得後唔後悔呢樣，我覺得冇乜可以講，因為每一件事都可以有兩面睇，可能有好嘅一面或壞嘅一面，未有結果好難下定論，自己相信啱嘅咪去做。」會不會自殺？他笑說：「冇，唔會自殺，一定唔會自殺，仲想喺呢個世界玩耐啲。」現在變了失業歌手，他說：「收入係會少咗，但唔係因為俾人拉咗，因為我最近教唱歌，呢排肺炎肆虐，好多人唔會出街，所以收入少咗，但暫時足夠自己生活，平時有儲少少錢，叫做夠食夠住唔會餓死，我同屋企人住。」
由逆權運動到武漢肺炎，覺得自己可以為社會做些甚麼？莊正說：「我覺得就算冇肺炎、冇呢場運動，每個人都要搵自己價值，做音樂嘅價值係講啲自己覺得啱嘅嘢、相信嘅嘢話畀世界知，有人認同有人唔認同，認同嘅人會互相影響，我惟有將呢樣嘢貢獻社會，鼓勵大家。」
