警隊1月份拎咗64萬個外科口罩，貴為獲發口罩第二多嘅政府部門，3萬個警員，計落都可以分到一人一個口罩。但實情原來係有警察受到壓榨，分唔到口罩不特止，仲要一個口罩戴四日㖭！咁悲壯嘅古仔，唔係八方屈警隊㗎，而係建制派打手屈穎妍自爆出來㗎。
呢位藍絲KOL前日寫文，話有文職警「識趣」咁將啲口罩留畀前線警，仲話好多環頭同部門都「資源緊絀」，有主要喺辦公室返工嘅警察甚至幾個星期無口罩，但Popo都「無怨言」咁話。呢個資源分配不平均嘅亂局，藍絲界居然當好人好事維穩，好多網民都睇唔過眼呢種高壓嘅警隊文化，質疑係咪「大sir就一日四個，散仔就四日一個」。八方就覺得，不在沉默中爆發，就在沉默中滅亡，警隊爆發武肺，個肺變花分分鐘仲快過膊頭有花，唔夠口罩仲忍氣吞聲，中咗招都未必有人可憐。