球壇兩大球王美斯和基斯坦奴朗拿度（C朗）2020年隔空繼續鬥！上禮拜六美斯喺西甲代表巴塞隆拿主場鬥伊巴一戰中上演大四喜，成為球壇有史以來首位直接參與入球過程超過1,000球嘅球員；不過C朗同日就不讓美斯專美，喺意甲幫祖雲達斯鬥史帕爾時踢咗職業生涯第1,000場比賽，當中射入咗一球令佢意甲入波走勢延續到第11場，追平咗巴迪斯圖達同加利亞雷拉嘅意甲連續入球紀錄呢！
美斯入球+助攻破千球
上禮拜六巴塞主場鬥伊巴一戰中，靠美斯個人半場戴帽，全場埋單計上演埋大四喜，幫巴塞以5:0大勝對手，美斯亦成為球壇首位入球及助攻破千嘅球員，呢個紀錄包括咗696個入球同306次助攻，合共參與咗1,002個直接入球。不過，呢個紀錄係唔計生涯射入757球嘅巴西傳奇球王比利，因為佢生涯嘅助攻數並冇任何正式嘅統計。另外，今次亦係美斯職業生涯中第七次大四喜，當中有六次都係喺西甲度上演，而佢喺球會生涯帽子戲法嘅次數亦暫時超越咗宿敵C朗，C朗嘅球會生涯共47次戴帽，但美斯目前已去到48次。
而C朗效力嘅祖記同日意甲作客以2:1險勝榜尾嘅史帕爾，今場亦係C朗合計球會同國家隊賽事生涯嘅第1,000場。不過，C朗呢1,000場嘅里程碑就有人質疑佢嘅認受性，商榷之處係在於當中兩場幫母會士砵亭B隊踢嘅比賽，有部份人認為呢兩場唔應該計算在內，因為士砵亭B隊嘅兩場比賽屬於葡乙賽事，據葡萄牙聯賽系統，只有葡超同葡甲先應計算成年隊比賽，所以今場祖雲達斯官方都冇特別為C朗宣傳同慶祝1,000場。
C朗平意甲連續入球紀錄
儘管呢1,000場比賽嘅計法有爭議，但今場建功嘅C朗已經連續11場意甲有波入，追平咗阿根廷名宿巴迪斯圖達同現效力森多利亞嘅加利亞雷拉嘅連續入球紀錄，就肯定冇爭議。睇番賽程，祖記下場將會歐聯作客對里昂，再下場係意甲主場迎戰國際米蘭，如果C朗呢兩場比賽都上陣，咁佢就可以名正言順達成1,000場嘅里程碑，更有機會喺下月初對國際嘅比賽建功，以12球成為意甲連續入球王！呢個紀錄，唔知美斯又會唔會想去意甲挑戰吓呢？
