上星期五立法會財務委員會討論防疫抗疫基金300億元撥款申請期間，民主派提出10項臨時動議，當中包括向全港18歲以上永久居民派一萬蚊，雖然係冇約束力動議，但都係議會嘅表態，對政府有壓力！但建制當日投反對票，搞到動議過唔到，結果工聯會、民建聯即日俾大批網民喺網上聲討，但話口未完，工聯會噚日又帶隊去政府總部請願，話要全民派一萬！究竟建制派係咪精神分裂？不過，有民主派同八方講，建制咁玩法，其實要為自己日後預算案投票留番個「後門」。
噚日帶隊去請願嘅工聯會立會議員麥美娟為佢哋投反對票解釋，話只係投票反對臨時動議，想300億防疫抗疫基金盡快通過，唔係反對全民派錢一萬元喎！民建聯主席李慧琼上周五亦喺fb出po，又係話只反臨時動議，唔係反派錢，但臨時動議就係要派一萬，再加上冇約束力，即使通過對300億防疫抗疫基金表決影響完全唔大！
有心水清嘅民主派同八方講，建制唔敢投贊成，其實等同留低支持派1萬投票記錄，若財爺陳茂波唔派足1萬、又或唔係全民派，民主派一定挾建制對預算案投反對票，建制就冇得轉身！𠵱家只係搞下請願，死唔留低支持派1萬投票記錄，日後政府即使唔派錢，建制仍要支持預算案，都有空間轉軚。
李八方
