健身教練趙勁皓（King）和太太盧頌之（DaDa）平日會帶兩歲多囡囡趙安嵐（乳名踢踢）到公園玩樂「放電」，但爆發武漢肺炎以來，全港停課，母女都減少外出。不過踢踢的精力依然無限，King和DaDa會跟囡囡做親子gym，King說：「踢踢好鍾意做運動，有時DaDa喺屋企做work out，踢踢會學佢做。踢踢冇時停，好活躍，我哋會同佢一齊喺屋企做吓簡單運動，等佢手腳都郁吓，因為佢仲好細，有時唔會聽指令，又好難限住佢每個動作做幾多下，唔似大人要有一定運動量，有時睇睇吓電視都可以同佢玩吓。」
採訪：比華利
攝影：林賓尼
第一式：練下半身
【Step up】
家長可以根據小朋友身高替他們準備踏板或矮凳，放前面地上，跟着數節奏一齊做上樓梯動作，若太幼小的孩子可由家長拖着在身邊一齊做，以免小朋友跌倒，尤其要注意是矮凳必須穩陣，每邊腳可以做約12次再換腳，這個step up動作做得多除可以練下半身，還收帶氧效果。
第二式：可掌上壓
【提腿】
先放軟墊在跟前，做出掌上壓的動作，雙手按軟墊支撐，雙腳交替做提腿。初學的小朋友做不到提腿就改做掌上壓，跟小朋友做親子gym沒有規限次數，量力而為，小朋友攰就會自動停。
第三式：較高難度
【弓箭步+深蹲+波比跳】
弓箭步是雙手放胸前，然後前後換腳跳約40秒。深蹲如同坐無影凳，同樣做約40秒。波比跳的難度相對前兩個動作高，動作近似掌上壓，手掌按地，配合雙腳前後跳，每組跳12次，男仔如應付到的話，中間可以加插做多一個掌上壓，可改善肌肉耐力，屬高難度體能挑戰。練熟三個動作，就可以三個為之一組連貫做。
第四式：練上身肌
【Dips】
揀選一張穩陣的凳，然後背貼着凳邊，雙手按着凳的兩角，雙腳可以略為屈曲，然後做出坐下動作，每次做12到15下為之一組，每次可以做4到5組，雙腳越放平，難度越高，此動作針對鍛煉上身肌肉。
