影視圈受中美貿易戰同反送中運動影響已經夠死，最近又有武漢肺炎，演唱會同影視製作全面暫停，某影視公司老闆「大大」近年有啲運滯，生意好唔掂，公司投資嘅戲全部蝕本，旗下產業全部係按上按，經濟環境好時可以頂得住，但當經濟環境變差，佢背後啲水喉都可能唔掂，自身難保，又點樣撐佢呢。
大大走投無路之際，竟然鋌而走險，攞老竇間公司去財仔抵押三億救自己公司，財仔計過數，大大爸間公司唔止值三億，所以就好放心咁借錢畀佢，到期大大冇錢還，財仔諗住接收大大爸嘅公司，上到去收數，公司高層即刻通知大大爸，大大爸當然即刻趕返公司了解。雖然大大爸好錫個仔，但呢間公司係用嚟畀全家人養老用，所以大大爸拒絕幫手還債，仲同財仔啲人講：「間公司係我嘅，我從來冇簽名做擔保人，呢份係冒簽合同，你要告佢（大大）就告，唔關我事，我唔會理！」最後大大同財仔講數，爭取寬限期慢慢還債。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。