打比郡上周五主場對富咸嘅英冠賽事，係前曼聯球星朗尼嘅第500場英格蘭聯賽，佢喺下半場射入一記Panenka 12碼助球隊領先，但之後被富咸追和1:1，雙方各得一分。英冠中游嘅打比郡上半場同排第三位嘅富咸互交白卷，55分鐘，朗尼挑波令富咸嘅添列姆犯手球，打比郡獲判12碼，朗尼主射以一記吊射式Panenka 12碼助球隊先開紀錄。不過，英冠領先射手阿歷山大米祖域喺71分鐘「窩利」破網，射入佢今季第22球，助富咸1:1逼和打比郡。34歲嘅朗尼賽後接受Sky Sports訪問時話︰「我主射12碼前總係好緊張，我喺職業生涯中未試過（Panenka 12碼）。」坦言仲享受比賽嘅朗尼又話︰「今場係第500次出場，到我唔再比賽時先會慶祝。」