曼城因違反財政公平原則而被禁止參加未來兩季歐洲賽事，有傳季尾球隊隨時星散，前鋒史達寧已同皇家馬德里扯上關係。呢位英格蘭前鋒近日接受訪問時仲向皇馬大送秋波，話「銀河艦隊」係間大球會，近年歐聯嘅表現超勁，似又想做反骨仔下季走人。
史達寧喺2015年為更好前途決定離開利物浦轉投曼城，佢近日接受西班牙媒體《阿斯報》嘅訪問，《阿斯報》仲用咗佢將皇馬同曼城波衫放喺兩邊膊頭嘅相做封面，佢喺訪問中講自己對皇馬嘅印象：「我目前係曼城球員，而且過得好開心，但我都要講嘅係，皇馬係一間好好嘅球會，白色嘅波衫有極大意義。」佢又大讚皇馬喺歐聯出色嘅表現：「連贏三次歐聯好難，我唔認為靠運氣就得，佢哋係有套勝利方程式，而且有超強嘅爭勝心，施丹會用盡一切方法去贏。」
哥迪奧拿幫講好話
史達寧嘅訪問令佢本身同皇馬嘅傳聞越傳越熱，傳到話佢下季就會加盟，有指離開嘅原因原來係錢作怪。有報道指出，曼城同球員簽約時，人工係會同歐聯有關，球員會因曼城拎到歐聯資格袋走約150萬鎊（約1,500萬港元）獎金。不過，家陣曼城被禁參加歐洲賽兩年，史達寧因為咁隨時收少約10%人工，當中包埋獎金、版權收入同肖像權收入等，下季離開曼城絕對唔出奇。
不過，曼城領隊哥迪奧拿就對史達寧百分百信任，仲話皇馬同巴塞隆拿呢啲大會睇中史達寧好正常：「球員講咩係佢哋自由，對住西班牙媒體讚皇馬好正常。」
神軒傷大腿唞三周
哥帥覺得史達寧會同球會一齊共患難：「我絕對相信我班球員嘅忠誠度，我哋已經共事咗幾年。我唔知道皇馬係咪已經搵咗史達寧嘅經理人傾轉會，但我對佢絕對信任。」曼城周中就會喺歐聯作客鬥皇馬，唔知史達寧會以咩心情應戰呢？
至於史達寧嘅昔日隊友、自從喺2011年加盟一直效力利物浦至今嘅佐敦軒達臣，就喺上周二歐聯16強首回合不敵馬德里體育會一仗拉傷大腿，領隊高普話佢將會休戰三星期。