印度餐廳老闆問喬寶寶有否興趣幫忙派發物資，身在印度參加緊親戚婚禮的喬寶寶，二話不說立即改機票返香港，回來後在餐廳門口派發兩萬口罩予65歲或以上長者，情況難免混亂，起碼盡了點綿力。
訪問這天，再次回到印度餐廳，喬寶寶說，身為印度錫克教徒的他，自細已在錫克廟內做義工，「啲人話呢個世界冇免費午餐，不過喺錫克教就日日有meal食，你去到世界各地錫克教廟，你都會有免費膳食，冇分種族，回教基督教天主教佛教印度教都好，我哋冇所謂㗎！」
4月，喬寶寶將會到蘇格蘭定居，離開生活了半世紀的香港。
「有好多嘢都唔捨得啦，始終我喺香港呢度長大……我覺得係天意囉！」4月底就50歲的喬寶寶說。
回顧半生，由沙士說起。
撰文：文嘉龍
攝影：陳俊強
做懲教唔識寫唔識睇
今天武肺，當年沙士。2003年，未入娛樂圈仍在懲教署任職的喬寶寶，這個年份，對他印象深刻，那一年沙士，他的細仔剛剛出世。「我細仔9月出世，其實我係食正㗎，我老婆2003年大肚，我記得4、5月送佢返去（蘇格蘭），大仔我就送咗先，嗰時疫情大家都唔知會點！」
做懲教署的他，沙士期間一個星期才返一次屋企，「我做緊懲教，做押解，有好多非法入境者嚟自廣東省，差人嗰邊48小時要起訴跟住上堂，然後還押監房看管，我哋就帶啲犯人，差唔多四個有一個係內地人，好多都係非法入境者。我哋都驚，嗰時用N95，啲膠手套呀預防衣呀都有ready，我哋一個禮拜返一次屋企，喺荔枝角職員休息室瞓覺，有碌架床，我哋伙記同伙記之間都好少傾偈，驚可能我會傳染咗畀佢，佢又有機會傳染畀我，更唔希望將呢個病毒帶返屋企囉，所以4月嘅時候太太過咗去（蘇格蘭），9月就生咗我細仔！」
喬寶寶的大哥，原來也同樣任職懲教署，「自己啲中文唔識寫唔識睇，我讀書係讀南亞裔學校，我諗除咗懲教署你唔識寫唔識睇係可以請，其他紀律部隊都唔請，一定要識寫識睇。嗰時我大佬都係做緊懲教署，喺白石船民營做緊，八幾年已經做緊，嗰時我入職，船民營要大量人手，我1989年就去考咗懲教署，去咗青洲，跟住去咗白石、萬宜、芝麻灣，跟住轉咗軍裝，我就去咗石壁，石壁之後去咗押解組（escort unit），大大話話走咗十個環頭！」
2005年參加無綫的《殘酷一叮》改變了喬寶寶一生。他說從來沒有想過自己會踏入娛樂圈，自細家中的電視機播放亞視為主，而他自己，竟然入了無綫。「我好少睇電視，細細個反而睇ATV《天蠶變》、《鱷魚淚》！我哋屋企好少睇local電視，你見好多印度人，佢哋好迷自己culture，好鍾意睇Bollywood，好多印度舖頭睇緊印度電影，播緊印度music！我嗰陣時睇《430穿梭機》，我好鍾意睇周星馳，覺得呢個人講嘢寸寸貢，好鍾意睇佢啲戲。」
今朝搭地鐵見到特首
喬寶寶這個名字，是他為參加《殘酷一叮》而改，「諗住玩吓，我啲同事幫我報名，佢攞咗我幅相，我同佢影嘅（合照），佢就剪咗一半，跟住就畀三色台，跟住就有人打嚟，佢留咗我名，因為我都冇中文名㗎嘛其實！」
他的全名Mohinderpaul Singh Gill，照譯是喬慕德保羅星，「喬寶寶」這三個字他覺得易記又易讀，他說主要方便觀眾記住他的名字，打去「匯應通」幫他投票。「初頭我入到去（《殘酷一叮》），我以為梁榮忠係歌手，以為李克勤係講波佬，因為我都有睇波，我見李克勤好多時都做評述！爭啲擦錯鞋認錯人囉，嗰時啲同事都講，如果你去到，你唔好唱克勤啲歌呀，因為佢都幾要面，佢未必俾你贏㗎，你反而唱佢啲friend譬如阿倫（譚詠麟），你可能會有啲機會！我自己都知我嘅唱功，係勝在三樣嘢，嚴重甩key、甩嘴、甩歌詞！」
最終贏了亞軍，經典一幕是他在胸毛剃出TVB三個字，「我冇嘢多，毛多，可以用啲毛玩吓gimmick，始終華人心口冇乜毛，我背脊毛都好誇張，不過𠵱家白晒箒，哈哈！我覺得如果玩『一叮』（字體）就冇乜意思啦，要擦就梗係擦個龍頭，不如剃TVB三個字睇吓！初頭監製都唔畀㗎，佢話呢個係合家歡節目，你咁樣露兩點，監製係Wilson肥仔（錢國偉），佢話唔得喎，你用第二個方法啦；我話你睇吓先啦，就算我除咗衫，個T同個B都已經遮住咗我個兩點，佢笑到碌地，佢話OK，go ahead！」
當時仍未辭職懲教署的他，又發生了另一段小插曲而大出風頭。就在2005年6月20日，他在地鐵車廂遇上翌日就要上京接受任命的候任特首曾蔭權，兩人還握手言談。「嗰時做緊押解組，我記得我晨早流流6點半由佐敦搭地鐵去荔枝角收押所，玻璃位有個尼泊爾人攝咗埋去，我就坐喺中間，我見到隔籬有一個阿叔問我，where are you going？我諗可能呢個阿叔有睇《殘酷一叮》啦，同我打招呼同我握手，對面我又見到有一個黑色袋，一個記者嘅物體，我就望清楚個阿叔，原來係非一般嘅阿叔，原來係我哋特首曾蔭權，佢冇戴煲呔，我同佢講congratulation to become The Chief Executive，佢又同我講very good performance，keep it up！」
返到懲教署，人人當笑話，「我返到荔枝角同老闆講，我話今朝搭地鐵見到特首，佢搭地鐵坐喺我隔籬，冇人理我呀，個個以為我亂噏。另一個沙展又搭訕，咦，咁你喺旺角見唔見到朱鎔基呀？另一個幫辦又話，咁你喺太子見唔見到馬英九呀？」
我覺得好多嘢要信民意
說起這段往事，喬寶寶忍不住即場用手機翻查當年新聞，邊看邊回味，「我做咗個電話訪問，講返個情形，我點樣撞到特首曾蔭權，新聞就講今朝特首曾蔭權落區撞到『叮王』喬寶寶，跟住我啲同事就話，原來你今朝講嘅嘢係堅，唔係X噏喎！」
如果發生在今時今日，在港鐵撞到特首林鄭又點？喬寶寶拿起枱上飲品苦笑一句：「我諗我哋都係飲果汁啦！」然後再說：「我覺得好多嘢要信民意囉，我覺得民意好緊要，香港人已經畀咗好多hints政府，我哋帶頭派口罩，呢啲嘢唔應該係我哋普羅市民做㗎，應該係政府帶頭，同埋政府要清楚知道香港嘅危機，因為經過香港沙士啦，我覺得危機感要大啲囉！」
危機感，喬寶寶隨時都有，尤其對於他患有先天性脊椎神經問題（痙攣）的細仔，今年快將17歲，醫生說要到19歲才可穩定下來，現在每隔兩年仍要做手術。「細仔𠵱家個病情都係差唔多啦，每兩年開一次刀，等佢19歲steady咗先得！因為佢嘅筋同骨生得唔balance，佢要擺一個artificial ligament（人造韌帶）落去，醫生話等佢19歲高度定咗，行路方面就會好好多囉！𠵱家佢頭半年會行得好，跟住年半佢都好差，要用一個triangle形枴杖去balance返！」
多得老婆和大仔在蘇格蘭照顧小兒子，喬寶寶與喬嫂1989年結婚至今31年了，當年原來結婚前兩人從未見面，是喬媽媽安排的盲婚啞嫁。「印度人盲婚啞嫁比例好大，阿媽畀咗三張相我睇，第一張係加拿大嘅印度西施，佢話呢個係千萬富婆，你毆跛腳都唔使憂，不過有小朋友，我話阿媽唔得呀；第二個就係英國嘅印度西施，佢話呢個都係百萬富婆，單身，不過體重同你差唔多，我望一望幅相，貴庚呀？佢話大你十年，我話我帶佢出街，話畀人聽佢係我老婆定老母呀；第三張就係我太太囉，佢係印度西施，家底同我哋差唔多，我見到張相very good！印度人係女家畀錢，我咪飛咗去印度囉，阿媽話乜都唔使帶，淨係帶一個牙刷就OK，因為女家嗰邊包晒住宿各方面。牧師喺中間，我哋圍住牧師行四個圈，嗰時淨係見到我老婆個鼻哥同嘴，我揭開面紗，一揭開先發覺，咦，原來印度嘅沙龍技術喺80年代係咁得㗎，哈哈！冇辦法啦，行咗禮，面對現實啦！」
講笑還講笑，喬寶寶其實感激太太多年來的體諒。離港在即回蘇格蘭，喬寶寶說：「最唔捨得香港嘢食同朋友，香港周圍都咁方便！有好多嘢都唔捨得啦，始終我喺香港呢度長大！去到嗰度係有一間大屋，係family life囉！我覺得好多人都想retired係有一個好休閒好平靜嘅生活，我覺得係天意！我都講咗係2020年過去，太太都照顧咗小朋友咁耐，輪都輪到我啦，畀佢relax吓，兩公婆可以帶埋細仔enjoy吓、做吓運動，我都肥咗好多，希望可以有個family life囉！」
【後記】我愛香港
去年10月離開了工作13年的無綫，早前播畢的《黃金有罪》喬寶寶都有十多集戲份，是其告別作了。喬寶寶穿上了他的招牌tee來做訪問，大大個「I Love HK」。他和印度餐廳老闆合照時，老闆用不純正廣東話說自己「識聽唔識講」，喬寶寶則笑自己「識講唔識睇又唔識寫」。
在香港土生土長的喬寶寶說：「係咪華人先做到香港人呢？其他國籍呢？我覺得唔係囉，你美國出世，就算你黑人好白人又好，或者係黃種人，你都會好proud of自己，話自己係American，咁我點解唔可以好proud of自己話自己係香港人呢？」
場地提供：Curry Leaf