西甲班霸巴塞隆拿因為翼鋒奧士文尼迪比利要「長唞」，被西班牙足總批准喺轉會市場關閉之後照可以引援，喺15日內喺西甲球會或自由市場度物色新兵，結果巴塞周四就宣佈買入護級分子雷加利斯嘅丹麥前鋒巴夫韋迪。
巴塞上周四已經向足總提交迪比利嘅傷病報告，要求喺轉會市場關閉後增兵。周一西班牙足總就決定畀巴塞15日嘅時間買人，不過呢位新兵就唔可以喺歐聯度上陣。巴塞本身已經有前鋒蘇亞雷斯受傷，家陣迪比利又證實要養傷半年，球隊好需要一個新前鋒，最終周四喺官網宣佈，以1,800萬歐元（約1.5億港元）解約金簽入雷加利斯嘅巴夫韋迪，雙方簽約四年半。
28歲嘅巴夫韋迪曾經征戰法甲，又踢過英冠球隊米杜士堡，今季喺西甲攻入六個聯賽入波，不過相信喺巴塞都係踢後備居多。