香港唔知中咗乜嘢咒，陷入末日瘋狂，市面蕭條，百業不興，零售慘淡之際，市民竟然只係買口罩、食米、廁紙、消毒酒精。口罩求過於供，還算有啲道理，整個東南亞都因為武漢肺炎而搶購口罩，但米喎，廁紙喎，大把供應，大家搶嚟做乜？2月17日凌晨五時，旺角突然發生盜賊打劫廁紙事件，BBC、CNN、Time、FT、彭博等廣泛報導，可說令香港貽笑國際。肯自重、有自尊嘅政府，應該感到羞愧，點解將香港搞到如斯田地。市民恐慌，唔可以話市民天真盲目，而係市民對政府完全冇信心，政府高官嘅公信力已經破產，講乜都冇人信，正是周永新教授形容佢嘅學生林鄭領導嘅政府：無德、無能、無信，故此彭博評論員一啲都唔客氣，指稱現時的香港為一個「失敗的國度」（Failed State）。香港本以行政效率、可靠性、穩定性聞名於世，故此可以成為世界三大金融城市，可嘆兩三年間就畀林鄭破壞殆盡，幾乎連跑馬都冇埋。
馬照跑係香港人生活一部份，係香港社會一個穩定因素，賽馬不止為特區政府每年貢獻110~120億稅收，亦為不少志願團體提供大量捐款，為教育機構供應建設基金，呢啲馬會貢獻當然係人所共知，但有時為人忽略嘅，就係賽馬向一半以上人口（中老年男人，勞工基層）送上精神寄託，若社會系學生唔識研究呢一點，就係堅離地，不與本地社會同呼吸。好多政府高官係馬會會員，歷來局長級人馬不乏遴選會員，林鄭當年成為發展局局長不久，就晉升為遴選會員，所有退休警隊一哥一退任就成為遴選會員（只有李明逵係例外，盧偉聰未知）。但係，高官馬會會員只識享受馬會設施餐飲，對賽馬就極少貢獻，好少去馬場，又唔養馬，根本不願認識賽馬，呢一啲高官處理武漢疫情不善，差過澳門好多，人地嚴肅應付疫情之時，我地特首就掛住去瑞士達沃斯威威。到疫情控制不了，就諗到要馬會「配合一下」嚴限賽馬入場人數，搞到花旗銀行贊助嘅香港金盃、國際一級賽，得307人入場，大量入唔到場之馬迷怨聲載道，花旗銀行總行唔知會唔會問一問：「呢筆贊助費冇乜廣告價值？」
或問，馬場會唔會傳播武漢肺炎？當然有一定嘅或然率，但馬會控制衛生情況素來嚴格，入場要測體溫，現時已是全民戴口罩情況，加上大陸人已經要檢疫14天，難以入場，馬場只容許預訂餐枱人士入場（如有不幸事件，可以追蹤密切接觸者），應該已將播毒或然率降至最低，林鄭政府應該配合一下啦！