新加坡政府抗疫，很講究追溯源頭，譬如目前鎖定的播毒圈，包括兩間禮拜堂和在某旅館舉行過的國際會議，抽絲剝繭地氈式起底，希望能控制大規模社區感染，所以假設中招者真如網民所講，包括來自武漢的應召女郎，衛生局冒着侵犯私隱罪名，佈下天羅地網搜刮恩客一點都不出奇。港府張開雙臂擁抱病毒的作風，猶似愛滋高峰期歡迎雞蟲不戴安全套上陣的腦殘鳳姐，在獅城市民眼中實在太豪放，連內地官方喉舌都終於宣佈習主席早在一月二十二日便得知疫情嚴重，雖然裝出笑臉揚言「冇事冇事，繼續跳舞」，私底下已命令疫區封鎖人流，林門鄭氏竟敢違背聖旨大開逃生門，兼夾唔戴罩到處拋胸獻世，睇怕唔止硬頸成疾存心鬥氣咁簡單，直頭有嚴重自殺傾向，咁拖落去已經冇乜意思，快啲打熱線向專業人士求助啦，話唔埋仲有得救呢。
在這種人人自危自重的時候，豬隊友流出過氣明星足球隊和警隊開波後共聚一堂視頻，只見一班不設防的麻甩佬（及其中幾位正室）毫無保留食飯唱歌又攬又抱，雖然場景似乎並非備受警員推崇的深圳海底撈，歡樂氣氛仍然撲面而來，冇份與《朋友》原唱者些牙米高峰的港胞又羨又恨，只好默默祝福與會者求仁得仁，有K大家一齊P，不要辜負《再見亦是淚》歌名背後的深意。正所謂唔滾唔知身體好，這些大哥一哥個個捨身成仁，響應冇病唔使戴口罩的維穩呼籲，勇過許久沒有公開露下半截面的當今聖上，堪稱盡忠報國最佳模範，千祈唔好唔記得，好人一世平安，壞人天眼恢恢疏不漏，啊吓。