【本報訊】地產界近期大合奏，紛紛促政府因為武漢肺炎疫情衝擊香港市道而撤回樓市辣招。地產及建造界立法會議員石禮謙（圖）昨表明憂慮負資產重臨，指政府要處理「金融疫症」，促請政府全面取消樓市辣招。運輸及房屋局局長陳帆卻只是遊花園，稱政府會密切留意樓市發展，不但未正面回應有否撤辣，連會否考慮也沒有交代。
陳帆遊花園「好多事情會變」
石禮謙在立會抗疫特別會議中指，香港除疫情外仍面對不少問題，「肺炎係最艱苦，但香港要繼續生存喺世界上，金融、地產、房屋好多問題要解決」，他形容現時香港市面「幾乎死城咁」，直言「擔心另一個疫症，係金融疫症」，指有超過120萬業主向銀行借貸供樓，「負資產係嚟緊㗎喇司長」，批評政府現有政策「完全冇理到」肺炎以外問題，「如果再唔收回辣招，疫症影響香港金融地產市場，係要開始做」。石又指金融市道問題為「影響成個香港崩潰嘅問題」，質問當局何時撤回辣招？
政務司長長張建宗回應表示，政府會審時度勢，「衡量邊啲地方幫到諗緊地方去幫。」運房局局長陳帆則指，當年不同印花稅推出時有其背後考量，「有當時問題存在」，亦有其政策理念，強調政府會密切注視樓市發展，確保樓市健康發展，又指現時好多事情發展會改變，今天講出日子都並不可信。
石禮謙會後回應本報查詢時指，港府抗疫工作「我哋睇到佢做得好唔好」，強調「經濟仲要生存」，重申目前樓市狀況不健康：「一手樓死晒，二手樓完全冇乜交易，失業潮、舖頭閂咗，銀行大多數要（催促）還錢，一還錢（業主）就負資產，銀行唔係你朋友，銀行只要你還錢。」認為政府當務之急是令香港市道復蘇，認為應全面撤銷樓市辣招，至於會否引致樓市反彈，他反指：「有市場控制喺度，你話反彈就反彈咩？」並強調：「賣唔到樓點賣地？冇收入你（政府）點使280億？」
■記者梁穎妍