新一季港台節目《頭條新聞》上周五播出，首集王喜化身《驚方訊息》主持忠勇毅，諷刺警隊喺對抗武漢肺炎嘅工作表現，節目出街後激到警方發信向廣播處長梁家榮表示不滿，商務及經濟發展局局長邱騰華亦敦促港台必須嚴格遵守《香港電台約章》，準確持平。網民關心節目會唔會被腰斬，噚日凌晨《頭條新聞》喺fb專頁發文：「多謝大家嘅支持！全部在心中，唔使講嘢，只要你哋畀個手指公我哋，我哋會繼續做好節目，在所不辭。」
兩星期一集
《頭條》預告有第二集，王喜有冇得留底成為關鍵，王喜噚日以短訊回覆《蘋果》：「『驚方訊息』係雙周刊，要留意28號播出嘅第三集。」而佢噚日接受商台節目訪問時再補充：「《驚方訊息》係兩星期一集，所以今個星期冇，唔好以為受打壓而cut咗。」
身為《頭條》主持嘅曾志豪喺社交網呼籲大家致函商經局、特首辦、港台企業傳訊同廣播處長，支持《頭條》同言論自由，王喜指自己係當事人，要避嫌，交由公眾處理。連登仔就呼籲要將該集節目YouTube瀏覽次數推上100萬，至截稿為止，有86萬瀏覽次數。
撰文：馮仁昭