【本報訊】香港乘客李先生與家人滯留鑽石公主號郵輪第26日，終看到上岸曙光，但他批評安倍晉三政府處理武漢肺炎欠缺危機意識，防疫混亂，「究竟今次係咪代表日方嘅隔離行動失敗？咁點解港府唔早啲安排包機接港人返港隔離？」他說：「一直都擔心，日本既然要全船乘客及船員留船檢疫隔離，點解唔派更多人員服務？既然隔離對象為乘客及船員，船員理應亦視為高危人士，為何仍要船員服務我哋？船員接觸到嘅物品都會畀乘客用，唔通咁樣不視作高危？」
稱禮物難彌補心理影響
李亦認為林鄭政府指示不清，只知道周三包機安排就緒，但無表明有否向日本當局要求優先為港人進行病毒測試等安排，亦完全不知抵港後的檢疫安排。入境處人員只向他們索取個人資料，詢問是否跟從港府包機，詳細消息要再等通知。
李先生一家周日（16日）曾接受病毒測試，當時檢疫人員只表示測試結果約需三日，如確診會收到通知，呈陰性則不會收到通知。截至昨晚他們尚未收到通知。他曾在連登討論區上載每日飲食餐單，對於部份網民對郵輪乘客的尖酸評論，他無奈回應：「我明白返港會構成公共衞生風險，但試問我哋唔返香港仲可以去邊？希望外界理解我哋已被隔離14日，雖然呢14日係好多禮物同埋膳食睇落唔錯。但我哋確實係被困房內，相信都彌補唔到我哋嘅心理影響。」
李滿意郵輪公司應變，亦直言會再乘搭，「睇得出船公司好用心為乘客爭取待遇，更新咗好多電影，加入多啲電視頻道、每日派報紙、board game、啤牌。膳食安排在隔離後亦一直有進步，派餐時間、款式選擇、味道都有改善」，惟最重要的日常清潔消毒服務卻嫌不足，「冇人入過房清潔，咁多日只派過一次消毒濕紙巾同一次清潔包，有毛巾、手套、除菌噴劑、消毒濕紙巾、垃圾袋。自己就問過housekeeper攞過兩次床單換」。
■記者丁詩詩