瞓身撐港人贏得「最強黃絲」稱呼嘅香港首富李嘉誠，明明已經退咗休做長和資深顧問，點知一場武漢肺炎加上政府無能，令已經91歲嘅佢要頻頻出手，甚至要親自上陣幫香港醫護人員撲口罩同保護衣，仲出動埋架Gulfstream私人飛機，喺海外入完貨再親自送物資返香港。
出動私人飛機運送
傳媒Fortune Insight噚日公開誠哥喺私人飛機嘅相，相中誠哥坐定定睇實工作人員搬啲大紙箱放去佢腳邊，報道就引述消息，話誠哥喺新西蘭嘅醫療機構買咗5,115件保護衣，會當手信帶返香港送畀前線醫護！同日下晝，李嘉誠基金會又喺社交網站發帖文公佈，首批N95口罩已運到香港，亦即將會送畀醫管局。
其實誠哥幫襯嘅呢間防護用品公司，本身有提供網購，但誠哥選擇親到當地，誠意爆燈，而間公司喺呢啲非常時期，仲肯大批賣物資畀香港人，誠哥亦禮尚往來，似乎特別喺張相度幫手硬銷間公司，所以個品牌好似植入式廣告咁睇得一清二楚。呢件保護衣單買本身唔貴，折合每件只係50蚊港紙，但計埋誠哥出私人飛機一來一回成本起碼200萬元，換言之運費隨時係批保護衣價值嘅10倍，咁叫佢哋做黃金戰衣應該絕不為過啦！
李八方
