成日話自己係香港抗疫幾咁落力及高風險嘅香港警察，有人叫佢哋去武漢貢獻國家就粒聲唔出扮唔知，到咗噚日終於有多少回應，不過身嬌肉貴嘅差人點會去武漢？只係喺離武漢十萬八千里嘅香港警察學院拍片當交差，名副其實講咗當做咗！
用普通話大叫「中國加油」
微博自稱「海港sir」、月初寄口罩去武漢嘅沙田警區助理指揮官陳凱港，噚日喺「香港警察」微博討論區發佈一段香港警察學院拍嘅短片，片入面由院長張靜帶領一群警員用普通話大叫「我們在香港攜手同心，共抗疫情！香港警察學院祝願前線的醫護人員和警務人員，加油！武漢加油！中國加油！」
短片獲唔少中國網民留言支持，又話「看得好感動」、「血脈相連、血濃於水」。警察公共關係科回覆話，警察學院係應北京公安大學學生會邀請拍片鼓勵武漢抗疫。人哋大陸公安醫護喺前線搵命博，香港警察拍條片當做咗嘢，咁又係嘅，連喺香港都有咁遠企咁遠啦。