Angelababy師妹、25歲中英混血女模麥少瑜（Fiona）今年夏天做鼠年新娘，嫁給陳冠希生意拍檔、潮人潘世亨（Kevin Poon）。樣子鬼鬼哋，但操一口流利廣東話的Fiona自認傳統女人，買新婚大屋先要睇風水，婚紗不用潮爆款，但一定要穿龍鳳裙褂，「媽咪幫我搵咗王家衛電影《花樣年華》嘅旗袍師傅，幫我做衫結婚着。」
撰文：林妙萍
攝影：林德雄
麥少瑜和拍拖兩年的潮人Kevin Poon結婚，揀了男友求婚地夏威夷，「初初我哋想搞個好細型嘅婚禮，但𠵱家要預多少少人，香港就可能淨係簽紙。我個人好傳統，嗰啲斟茶儀式，一定要做足。」
睇風水買屋
鬼妹仔樣子的Fiona原來「白皮黃心」，非常中國化，喜歡講中文多過英文，平日寧願吃中餐、拜觀音、信風水，結婚新居未買到，都因為風水，「我哋搵咗一間屋，幾鍾意，但風水師傅睇咗，話唔好，所以冇買到。」婚禮現時仍未知會否受疫情影響，但大日子最令她擔心的婚紗已找到，放下心頭大石，「我鍾意公主裙嗰類cut，又鍾意Hailey Bieber背後有啲字，Vera Wang都有幾套係咁樣。最後喺中環有間Trinity Bridal，佢哋好好，花咗好多時間幫我搵。我喺夏威夷搞，要走來走去，所以搵到件小型A line，之後喺草地晚宴，會再換一條貼身啲嘅晚裝。媽咪仲幫我搵咗王家衛電影《花樣年華》嘅旗袍師傅，幫我做裙褂，咁真係好傳統。」至於未婚夫KP就會穿禮服，配潮人波鞋，Fiona說：「I really feel I am married，我都會煮飯，已經有人叫我潘太，KP都成日同人介紹『呢個我老婆』呀！」
「鍾意佢勤力」
25歲就決定結婚，Fiona指父母沒有反對，她覺得未婚夫比自己預期的另一半更好，「佢個性格同我性格有啲似，有啲唔似，拍拖初期要互相適應，我個personality係好safe，佢就會突然話『我哋聽日去上海』，好多突發事。」至於最愛另一半哪些特質？「好多！好尷尬㖭，我鍾意佢好勤力，同埋好錫我屋企人，我要求嘅嘢，佢永遠畀到我更加多。」加上KP會為Fiona爸爸舉行生日派對，求婚前先徵求未來外父同意，都令麥家放心將女兒嫁出去。
KP和陳冠希合作開潮牌、舉行名牌公關活動等，Fiona因為KP的關係，都出入時尚潮流圈，她甜絲絲地說：「其實我冇諗呢個係唔係fashion event，會見到乜人，去邊都咁開心，因為同佢一齊！」
更多精采時尚內容，盡在 http://add.appledaily.com 。