香港人對抗武漢肺炎心慌慌,喺不信任政府嘅本能反應下,到處出現搶購,有見及此,各大政黨都有幫忙團購,建制第一大黨民建聯成功爭取2,500條廁紙賣畀18區街坊,但有心水清嘅網民就問拎廁紙嗰陣要住址證明嘅用途何在,質疑係咪種票之用?
網民質疑種票
Blogger葉一知喺facebook連出兩個po,質疑民記賣廁紙點解要住址證明,「你去藥房超市買嘢使唔使住址證明?唯一用途:種票用囉!」話說民記呢個賣廁紙活動,查實更多魔鬼細節在其中㗎,八方實測訂廁紙,登記嗰陣時必定要填姓名、有WhatsApp功能嘅電話號碼同埋詳細住址外,最重要係佢叫人填選「本人同意以上個人資料被用作民建聯日後通知及聯絡」,呢個必答題得「同意」唯一選項,即係日後唔畀聯絡就唔准買佢啲廁紙?