有不少人愈老愈愛中共，以為愛共即是愛中國。去年呢個時候，林鄭月娥開始搞修訂逃犯條例，之後搞出個大頭佛以來，香港人分裂成藍絲黃絲兩大派，藍絲不少係叫讀過書嘅人，左丁山就有好多同學係藍絲，藍絲特點係貧富懸殊，富藍絲好有錢，在中環好有地位，窮藍絲係讀書少，年紀大，多數住在殘破舊樓及公屋，與富藍絲住在半山、淺水灣，完全係兩個不同世界。點解佢地會同樣認為愛共即是愛國呢？大學內之社會研究人員應該深入研究吓。其實自2014佔中運動至2019反送中運動以來，有不少社會政治現象可供社會學家研究，寫學術論文、博士論文有大把材料，準博士或博士後唔寫就笨，或者係懶。
以左丁山啲粗疏非學術性觀察，富藍絲不少年紀細時（中學大學時代）少讀中國歷史或世界歷史，一旦大學畢業，自外國回來搵到真銀以後，開始到中國搞貿易或投資，就畀1980~2019之中國經濟增長感動，開始睇中國歷史書，然後先至知道：「哎吔，乜以前咁慘㗎，飽受帝國主義欺凌，英國佬為鴉片搶咗香港，非常不正義。」於是愛國之心，油然而起，見到上海北京深圳建設（全部物質化）而覺得「中國強起來了」，非常自豪，再諗番在英美讀書嗰陣，俾鬼仔歧視過，更加愛共愛國啦，只係還是不肯燒咗屋企藏住嘅英國加澳紐護照。
另外一批冇浸過洋水嘅本地大學生，讀書時就開始傾左，畢業後憑大學學位搵工，40年來目睹中國有飛躍經濟進展，自己有份參與其中，一帆風順，由住屯門至搬上大坑豪宅，識得在上海置業，升值咗二三十倍，自然對祖國感激涕零，信仰中央總是對的，香港人要聽話就有靚蘋果食。之不過又係唔願放棄外國護照。窮藍絲又點呀？讀書少，勞工階層，自細加入工聯會，常返鄉下探親，無外國護照，無論甚麼情況，都係跟着黨走，聽黨話，畀毛澤東玩完玩殘，仍然話：「那是為了集體利益。」呢班人幾十年始終如一，左丁山幾尊重，只係同情佢地冇獨立思想啫；至於富藍絲，人地位高權重，身家大把，送晒仔女去英美讀寄宿學校，真係成功人士，成日講身為中國人感到自豪，不過佢地嘅仔女入咗牛津劍橋，唔知會唔會成為另一個唐英年外姪女！呢幾年又有啲新品種，就係在北美居住三四十年後回流嘅加拿大人美國人，愛共愛國仲緊要過本港持外國護照嘅藍絲，在WhatsApp群組表達痛恨美國之情，令人以為佢地在美國被歧視到乞米，走返嚟香港，所以先至咁嬲美國；但又唔係喎，佢地返嚟香港生活優遊到極，退休享清福啫，佢地為何如此對美國反感，大罵黃絲賣國，真諗唔明。