POPO之首PK鄧連同下屬星期日晚同班廢老級藝人食咗餐「擴」疫晚宴，席間自爆本身唔識做警察，但睇吓睇吓成龍同方中信扮警察就識做，各大傳媒事後當然同警方問清問楚，究竟PK鄧此話何解？
PPRB唔回應「學成龍當差」
警察公共關係科（PPRB）就選擇性回應，只係認咗呢場播毒高危聚餐確有發生，聚餐費由雙方共同承擔，不涉公帑，但就當傳媒其他問題冇到。呢排POPO最鍾意撲出嚟亂指控有人散播假消息做假新聞抹黑警隊同急住澄清，但八方見呢次過足24小時都冇任何聲氣，真係想唔信PK鄧係講真話都難囉。
如果睇戲可以學到點當差，咁醫生機師律師廚師甚至殺手應該成行成市，甚至大家會識穿梭時空同環遊宇宙。八方仲見到連永恒不死嘅亞視都有份抽水，因為PK鄧話自己去區議會講嘢咁叻，原來係聽曾志偉嗰啲《開心字典》，ATV於是搵返當年節目片放喺fb專頁，叫大家講吓睇完又學到咩。
雖然《開心字典》當年收視唔錯，但只係賣無厘頭，節目根本毫無養份，更遑論可以用嚟訓練口才。而香港人眼睛係雪亮嘅，八方見唔少留言好高汁，例如「唔怪得𠵱家喺警察記者會度語無倫次」、「曾志偉唔夠人講，次次都狂打林敏驄，唔怪得」，為大家完美解釋晒今日警隊嘅所作所為。不過，八方要講清楚，堂堂警隊之首去區議會其實係回應市民質詢，唔係表演口才，PK鄧嗰啲表現都可以自詡講嘢叻，難怪警察會認為自己係受市民熱烈愛戴啦！
李八方